IRAN – Ndotja e ajrit arrin nivele alarmante
TEHERAN, 29 nëntor /ATSH-DPA/- Autoritetet në Iran po paralajmërojnë se ndotja e ajrit në Teheran dhe disa qytete të tjera ka arritur nivele alarmante.
Indeksi i Cilësisë së Ajrit në këto qytete ka arritur midis 170 dhe 200, që konsiderohet “shumë i pashëndetshëm” dhe i rrezikshëm për të gjitha grupmoshat.
Zyrtarët e mjedisit zhvilluan një takim urgjent, gjatë të cilit banorëve iu kërkua të shmangnin daljet nga shtëpitë e tyre.
Shkollat dhe universitetet janë mbyllur, dhe disa zyra qeveritare kanë kaluar në punë në distancë.
Disa banka në Teheran janë mbyllur pjesërisht dhe po operojnë me turne të reduktuara. Policia e trafikut ka vendosur gjithashtu kufizime në përdorimin e automjeteve.
Sipas statistikave nga Ministria e Shëndetësisë, mbi 58,000 njerëz vdiqën si pasojë e ndotjes së ajrit vitin e kaluar.
“Situata aktuale është bërë shumë alarmante dhe sëmundjet e lidhura me të janë në rritje”, tha Jalal Moussavi, zëdhënës i komisionit parlamentar të mjedisit, për agjencinë e lajmeve ISNA.
Cilësia e dobët e ajrit në Teheran shkaktohet kryesisht nga miliona automjete në rrugët e tij.
Me mundësi të kufizuara transporti publik, shumë banorë mbështeten në makina private, ndërsa karburanti i lirë dhe me cilësi të ulët përkeqëson emetimet.
Zona metropolitane ka rreth 15 milionë banorë, duke u rritur në gati 19 milionë gjatë ditës me banorët që udhëtojnë për në punë.
Ndotja zakonisht përkeqësohet në dimër dhe verë për shkak të përdorimit në rritje të ngrohjes dhe ajrit të kondicionuar.
Krahas krizës së ndotjes, Teherani po përballet me mungesa të mëdha uji të shkaktuara nga thatësira. Në disa rrethe, uji ndërpritet gjatë natës ose presioni bie ndjeshëm.
Presidenti iranian, Masoud Pezeshkian ka sugjeruar mundësinë teorike të evakuimit të popullsisë së kryeqytetit nëse nuk bie shi së shpejti, megjithëse zyrtarët thonë se një veprim i tillë do të ishte jorealist. //a.i/