IZRAEL – Gantz dorëhiqet nga qeveria e emergjencës, pas mosmarrëveshjeve për të ardhmen e Gazës

TEL AVIV, 10 qershor /ATSH-DPA/ – Politikani izraelit me ndikim, Benny Gantz po largohet nga qeveria emergjente e formuar në Izrael pas sulmit nga lëvizja islamike palestineze Hamas më 7 tetor, për shkak të mosmarrëveshjeve të opinioneve mbi të ardhmen e Rripit të Gazës, u tha ai gazetarëve të dielën në mbrëmje vonë.

Ish-ministri i Mbrojtjes, 65 vjeç, kishte kërcënuar tashmë se do të merrte këtë hap nëse qeveria e kryeministrit Benjamin Netanyahu nuk arrinte të hartonte një plan për një urdhër të pasluftës në Rripin e Gazës.

Ultimatumi i lëshuar nga Gantz ndaj Netanyahut për këtë çështje disa javë më parë skadoi të shtunën.

Megjithatë, për shkak të shpëtimit dramatik të katër pengjeve nga Rripi i Gazës, ai shtyu një konferencë të planifikuar për shtyp në minutën e fundit.

Sipas Gantz, dorëheqja nga qeveria e udhëhequr nga Netanyahu prek edhe anëtarët e tjerë të partisë së tij të Unitetit Kombëtar.

Megjithatë, ai nuk do të rrëzojë udhëheqjen e Izraelit me këtë hap, sepse Kabineti fetar i djathtë i Netanyahut ka ende një shumicë prej 64 nga 120 vende në parlament, edhe pa partinë e Gantz.

Ish gjenerali Gantz iu bashkua qeverisë së Netanyahut si ministër pa portofol pas sulmit të paprecedentë nga Hamasi dhe grupet e tjera terroriste, me qëllim që të dërgonte një sinjal uniteti.

Partia centriste Uniteti Kombëtar, e udhëhequr nga Gantz, është në fakt në opozitë./ a.jor.