Ilir Proda zyrtarisht kryepolic, ministri Hoxha: Hetimi për dekonspirim? SPAK e verifikoi, është i pastër

Këshilli i Ministrave miratoi Drjetorin e ri të Përgjithshëm të Policisë së Shtetit z.Ilir Proda.

Zyrtarisht, Proda është kreu i ri i uniformave blu. Ishte ministri i Brendshëm i cili përzgjodhi emrin e tij si më i vlerësuari nga Komisioni i Posaçëm pas intervistimit të gjithë kandidaturave. Proda u vlerësua për platformën e paraqitur dhe objektivat që parashtroi për luftën ndaj krimit dhe drejtimin në funksion të ligjit të strukturës së policisë.

Pas një konkurimi prej më shumë se 10 drejtuesish të lartë policie dhe verifikimet e bëra përmes procesit të pastërtisë të figurës së kandidatëve, kandidati i cili u emërua sot drejtor i Përgjithshëm i Policisë do të jetë në krye të policisë së shtetit.

I pyetur në lidhje me verifikimin e celularit të Prodës nga SPAK pas dyshimeve për dekonspirim të një operacioni, Hoxha garantoi se figura e tij është verifikuar edhe nga SPAK dhe rezultoi e pastër.

Kandidaturat janë verifikuar nga çdo organ ligjzbatues dhe pastërtia e tyre është në përputhje të plotë me ligjin. Ky proces konsiderohet transparent, integrues dhe drejtori i ri i Përgjithshëm i Policisë së Shtetit i ka kaluar këto etapa verifikimi.

Hoxha paralajmëroi se në konkurs do të futen edhe drejtuesit e qarqeve.

Menjëherë pas emërimit të tij si drjetor i Përgjithshëm i Policisë së Shtetit do të vendosim konkurimin e ri, i cili do të hapë një proces të ri përsa i përket të gjithë drejtuesve të policisë në qarqe.

Ndryshime pas emërimit të drejtuesve të rinj të 12 qarqeve të policisë, pritet që të ketë edhe në nivelin e Komisariateve. /vizionplus.tv