Informacioni i deklasifikuar, SHBA: Hamasi përdori spitalin e Gazës si qendër komanduese

SHBA ka bërë të ditur se Hamasi dhe militantë të tjerë të Gazës përdorën kompleksin më të madh spitalor të enklavës si qendër komandimi, si dhe për të mbajtur pengjet. 

 “Komuniteti i Inteligjencës Amerikane ka besim në gjykimin e tij mbi këtë temë dhe ka vërtetuar në mënyrë të pavarur informacionin mbi përdorimin e kompleksit spitalor nga Hamasi dhe (Xhiadi Islamik Palestinez) për një sërë qëllimesh që lidhen me fushatën e tij kundër Izraelit,” ka theksuar një prej zyrtarëve amerikanë. 

Por komuniteti i inteligjencës amerikane nuk lëshoi asnjë provë të re për të mbështetur vlerësimin e tij pasi u ngritën pyetje se deri në çfarë mase Spitali Al-Shifa ishte me të vërtetë “zemra rrahëse” e operacioneve të Hamasit, siç kishte pretenduar Izraeli, transmeton CNN. 

Në fund të dhjetorit, Uashington Post publikoi një hetim të gjerë që hodhi dyshime mbi disa nga pretendimet e Izraelit. Izraeli ishte nën kritika të gjera për rrethimin dhe sulmin e nëntorit në spitalin në vështirësi, ku mjekët e kishin përshkruar situatën si “katastrofike”.

Inteligjenca e re u bëri jehonë pretendimeve të mëparshme të administratës së presidentit amerikan Joe Biden dhe Izraelit në ditët dhe javët përpara bastisjes së nëntorit të Izraelit në spitalin Al-Shifa, se inteligjenca tregoi se Hamasi kishte një nyje komandimi dhe kontrolli në tunelet nën kompleksin spitalor.

Një zëdhënës i Këshillit të Sigurisë Kombëtare, John Kirby, kishte thënë gjithashtu se spitali po përdorej për të ruajtur armët dhe për të mbajtur pengje. 

Në nëntor, Hamasi pranoi se kishte përdorur spitalin për të sjellë pengje, ndërsa ata “monitoronin me përpikëri” shëndetin e tyre përpara se t’i ndalonin në vende të ndryshme, pasi Izraeli publikoi video nga kamerat e sigurisë së spitalit që tregonin pengjet që silleshin brenda. Por Hamasi mohoi përdorimin e spitalit si qendër komanduese.
/rtsh.al/