Integrimi në BE, Panariti vizitë zyrtare në Qipro

TIRANE- Ministri i Punëve të Jashtme, Edmond Panariti zhvillon sot një vizitë zyrtare në Republikën e Qipros, i ftuar nga homologia qipriote, Erato Kozako – Marcoullis, vendi i së cilës mban edhe postin e Presidencës së radhës të BE-së.

Lajmin e ben me dije zyra per shtyp e ministrise, sipas te ciles Panariti do të takohet dhe zhvillojë bisedime me Erato Kozako-Marcoullis, Kryetarin e Parlamentit, Yiannakis Omirou, dhe do të pritet në një takim të veçantë nga Presidenti i Republikës së Qipros, Demetris Christofias.

“Në qendër të bisedimeve që Ministri Panariti do të zhvillojë në Nikozia do të jenë çështjet që kanë të bëjnë me procesin e integrimit të Shqipërisë në BE, ecuria e përmbushjes së 12 Prioriteteve të Komisionit Evropian për marrjen e statusit të vendit kandidat, si dhe zhvillimet e ardhshme në këtë drejtim”- thuhet ne njoftim.

Intensifikimi i marrëdhënieve dypalëshe dhe zhvillimet në rajonin tonë do të jenë të tjera çështje të rëndësishme që do të diskutohen në takimet që Ministri Panariti do të zhvillojë me palën qipriote.