Inteligjenca Artificiale “pasuron” miliarderët/ Fitime kolosale për bosët e teknologjisë në SHBA

Një bum i fortë i tregut të aksioneve në sektorin e inteligjencës artificiale (AI) u ka shtuar më shumë se gjysmë trilioni dollarë pasurisë së miliarderëve amerikanë të teknologjisë gjatë vitit 2025, sipas të dhënave të publikuara nga Bloomberg.

Dhjetë drejtuesit dhe themeluesit kryesorë të disa prej kompanive më të mëdha teknologjike në botë kanë rritur pasurinë e tyre të përbashkët në rreth 2.5 trilionë dollarë, nga 1.9 trilionë dollarë një vit më parë.

Në krye të listës qëndron Elon Musk, njeriu më i pasur në botë, i cili ka përfituar ndjeshëm nga rritja e investimeve në inteligjencën artificiale. Pasuria e tij neto është rritur me gati 50%, duke arritur në 645 miliardë dollarë. Musk, i cili zotëron interesa edhe në kompaninë e AI-së xAI, u bë në tetor personi i parë në botë me një pasuri mbi 500 miliardë dollarë.

Ai renditet përpara bashkëthemeluesit të Google, Larry Page, dhe themeluesit të Amazon, Jeff Bezos. Pasuria e Page vlerësohet rreth 270 miliardë dollarë, ndërsa ajo e Bezos rreth 255 miliardë dollarë.

Një tjetër përfitues i madh nga bum-i i AI-së ishte Jensen Huang, drejtori ekzekutiv i prodhuesit të çipave Nvidia. Pasuria e tij u rrit me 41.8 miliardë dollarë, duke arritur në 159 miliardë dollarë. Nvidia, e cila prodhon çipa kyç për zhvillimin e inteligjencës artificiale, u bë në tetor kompania e parë në botë me vlerë tregu 5 trilionë dollarë.

Rritja e shpejtë e investimeve në AI ka nxitur gjithashtu shqetësime për një korrigjim të mundshëm të tregjeve financiare. Banka e Anglisë ka paralajmëruar se tregjet e aksioneve, veçanërisht ato të teknologjisë, janë të ekspozuara ndaj rrezikut nëse pritshmëritë për ndikimin e AI-së rezultojnë më pak optimiste.

Edhe pse sektori i teknologjisë dominon listën e përfituesve, rritje të ndjeshme të pasurisë kanë shënuar edhe figura të tjera të njohura globale. Bernard Arnault, drejtuesi i gjigantit të luksit LVMH, ka shtuar 28.5 miliardë dollarë në pasurinë e tij, ndërsa Amancio Ortega, themeluesi i Inditex dhe pronari i Zara-s, ka përfituar 34.3 miliardë dollarë, falë dividentëve rekord të grupit.

Përqendrimi gjithnjë e më i madh i pasurisë në duart e një elite shumë të vogël po rikthen në qendër të debatit çështjen e pabarazisë ekonomike dhe taksimit të pasurisë, ndërsa inteligjenca artificiale vijon të transformojë tregjet globale.