Iran, arrestohen 80 të rinj "rebelë"

Një valë arrestimesh kanë përfshirë ditën e premte të gjithë qytetin e Teheranit.
Mbi 80 të rinj iranianë u arrestuan për pjesëmarrje në një koncert muzikor të jashtëligjshëm si dhe për konsumim pijesh alkoolike. Të rinjtë 'rebelë' u ndaluan pasi ishin pjesëmarrës në një koncert me muzikë 'perëndimore'. Që të gjithë të ndaluarit u prangosën prej policisë së ruajtjes së moralit dhe në vendngjarje. Autoritetet iraniane njoftuan se janë gjetur shishe alkooli. Konsumimi i alkoolit përbën vepër të rëndë penale në Iran. Pije të tilla futen në vend nëpërmjet rrugëve klandestine, madje në disa raste trafikantët e tyre kanë marrë dënimn kapital, që është dënimi me varje.
Pas kësaj vale arrestimesh në një deklaratë për shtyp, dega e komitetit të Helsinkit në Teheran i ka dënuar ashpërsisht arrestimet e kryera nga autoritetet policore.
Kohët e fundit janë rritur ndjeshëm arrestimet. Përveç eksponentëve opozitarë, dhe të rinjve "rebelë", policia iraniane ka arrestuar një numër të konsiderueshëm gazetarësh dhe njerëzish të cilët kanë lidhje me mediat opozitare.