Ish-presidenti Sarkozy nuk do të shpëtojë paq/ Konfirmohet dënimi në Gjykatën e Lartë të Francës: Në qeli për një vit

Gjykata më e lartë e Francës ka miratuar dënimin e ish-presidentit Nicolas Sarkozy për financim të paligjshëm të fushatës së rizgjedhjes së vitit 2012, duke lënë në fuqi vendimin që e dënon me një vit burg, gjysmën e të cilit me pezullim. 

Vendimi nënkupton se 70-vjeçari mund ta vuajë dënimin me një etiketë elektronike, pa hyrë fizikisht në burg. 

Sarkozy është shpallur fajtor për tejkalim masiv të shpenzimeve të fushatës dhe për përdorimin e kompanisë së PR-it, Bygmalion, për të fshehur kostot reale. Ai ka mohuar vazhdimisht akuzat. 

Sipas prokurorëve, partia e tij UMP shpenzoi gati dyfishin e limitit ligjor prej 22.5 milionë eurosh, duke financuar tubime dhe ngjarje luksoze të fushatës. Për të maskuar shkeljen, pagesat u regjistruan përmes Bygmalion-it, e cila i faturonte partisë dhe jo fushatës. 

Ky është dënimi i dytë përfundimtar për Sarkozy-n. Në dhjetor të vitit të kaluar, Gjykata e Lartë e Apelit la në fuqi dënimin e tij për korrupsion, çka e detyroi të mbante një byzylyk elektronik për 6 muaj. 

Në shtator, ai u dënua me pesë vjet burg për konspiracion kriminal. Sarkozy kaloi 20 ditë në burg përpara se të lirohej në nëntor.