Izraeli nis fazën e dytë të ofensivës për pushtimin e Gazës
Shefi i Shtabit të Përgjithshëm Izraelit, Eyal Zamir, ka njoftuar zyrtarisht nisjen e fazës së dytë të ofensivës për të pushtuar qytetin e Gazës.
“Kemi hyrë në fazën e dytë të Operacionit për të përmbushur objektivat e luftës. Kthimi i pengjeve tona është një mision moral dhe kombëtar”, u tha Zamir trupave të ushtrisë në terren të mërkurën.
Ky veprim erdhi disa ditë pasi ushtria izraelite e shpalli qytetin e Gazës një “zonë të rrezikshme luftimi” javën e kaluar.
Më 8 gusht, Kabineti i Sigurisë i Izraelit miratoi një plan nga kryeministri Benjamin Netanyahu për të ripushtuar gradualisht Gazën, duke filluar me qytetin e Gazës.
Plani parashikon zhvendosjen e afërsisht 1 milion palestinezëve nga qyteti i Gazës në jug, e ndjekur nga rrethimi i qytetit dhe ndërhyrjet në lagjet e banuara.
Si pjesë e kësaj, ushtria nisi një sulm të madh më 11 gusht në lagjen Zeitoun të Qytetit të Gazës.
Izraeli ka vrarë mbi 63,700 palestinezë në Gaza që nga tetori i vitit 2023. Sulmi ushtarak e ka shkatërruar enklavën, e cila aktualisht po përballet me katastrofën humanitare.
Nëntorin e kaluar, Gjykata Ndërkombëtare Penale lëshoi urdhër-arreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
/rtsh.al/