Java Botërore e Ushqyerjes me Gji, takime ndërgjegjësuese me nëna të reja në Korçë
Rëndësia e ushqyerjes me gji ka qenë në fokusin e aktiviteteve të zhvilluara nga Njësia Vendore e Kujdesit Shëndetësor Korçë, në kuadër të Javës Botërore të Ushqyerjes me Gji, që shënohet çdo vit nga 1 deri më 7 gusht. Mjekja pediatre, Dituri Sulollari, theksoi se shumica e nënave në Korçë zgjedhin të ushqejnë me gji, duke vlerësuar këtë si mënyrën më të mirë për zhvillimin fizik dhe psikomotor të fëmijëve.
“Shumica e nënave janë të ndërgjegjësuara që ushqyerja me gji është kryesorja. Nëse para disa vitesh nga mosha 0-6 muajsh duhet t’i ushqenim me gji, në kohët e sotme themi që ushqyerja me gji të vazhdojë deri në 2 vite”, u shpreh mjekja pediatre.
Një nga nënat pjesëmarrëse ndau eksperiencën e saj personale me dy vajzat, duke e cilësuar ushqyerjen me gji si një përvojë të çmuar dhe duke i bërë thirrje nënave të reja që ta përqafojnë këtë praktikë natyrale për të mirën e fëmijës dhe të tyre.
“Qumështi i gjirit ka të tjera vlera për fëmijët dhe iu bëj thirrje të gjitha nënave që t’i ushqejnë me gji” u shpreh Juela Muço.
Kjo javë nuk është thjesht një fushatë shëndetësore, por një lëvizje globale për të investuar në të ardhmen e fëmijëve, familjeve dhe komuniteteve.
Gazetare: Eftjola Fili
/rtsh.al/