Jon Hunstman heq dorë zyrtarisht nga gara republikane

Ish-ambasadori amerikan në Kinë, Jon Hunstman, tha se heq dorë nga gara për të fituar emërimin e Partisë Republikane si kandidat për president. Ai e bëri njoftimin në një konferencë shtypi në Karolinën e Jugut.

Jon Huntsman tha se tërhiqej nga gara, për të mos u bërë pengesë për kandidatin tjetër republikan Mitt Romney, i cili kryeson garën.

Huntsman u bëri thirrje kandidatëve të tjerë republikanë të mos sulmojnë njëri-tjetrin, por t’i ruajnë energjitë e tyre në rrugën për të sfiduar presidentin demokrat, Barack Obama. Përçarja, tha ai, nuk i shërben interesave të vendit.

Njoftimi i Huntsman nënkupton se ish guvernatori i shtetit Massachusetts, Mitt Romney, është një hap më afër emërimit si kandidati republikan për president.

Huntsman, ashtu si Romney, i përket gjithashtu besimit mormon dhe është konservator i moderuar.

Njoftimi i tij vjen pasi gazeta më e madhe e shtetit të Karolinës së Jugut shprehu mbështetje për kandidaturën e Huntsmanit.

Huntsman kishte vendosur të mos konkurronte në shtetin e parë ku u zhvilluan votimet, Iowa dhe t’i përqendronte forcat në garën e dytë në shtetin New Hampshire. Megjithatë, ai u rendit i treti në New Hampshire, pas Romney-it dhe kongresistit nga Texasi, Ron Paul.

Në garën republikane mbeten tani pesë kandidatë: Romney, Paul, Santorum, Gingrich dhe Perry.