Jonuzi beson te Kombëtarja kuqezi

Sulmuesi kosovar, Ahmet Jonuzi (21 vjeç), është shumë afër realizimit të ëndrrës së tij. Një ftesë nga Kombëtarja shqiptare do të përmbushte ëndrrën e të riut, që më sukses po militon në skuadrën Vorskla Poltava në Ukrainës. Jonuzi ka rrëfyer se disa ditë më parë është kontaktuar nga drejtuesit e FSHF-së. Sipas tij, mundësitë që ai të ftohet nga kroati Josip Kuzhe janë shumë të mëdha. “Zyrtarët e Federatës Shqiptare të Futbollit më kanë kontaktuar pak ditë më parë lidhur me mundësinë që të ftohem në përfaqësuesen A të Shqipërisë. Besoj se shumë shpejt do ta marr ftesën e shumëpritur nga Kuzhe”, ka thënë sulmuesi për “Albaniasoccer.com”. Ai ka shtuar se kroati Kuzhe e ka vëzhguar në një ndeshje që ka zhvilluar për ekipin shqiptar U-21. “Pak kohë më parë, gjatë një ndeshje që kam zhvilluar për kombëtaren U-21, Kuzhe më ka vëzhguar nga afër. Tashmë jam në pritje të një ftese të mundshme nga trajneri i Shqipërisë, e cila mund të vijë që muajin e ardhshëm për miqësoren e radhës”, përfundoi Jonuzi.