KAJRO – Steinmeier viziton Egjiptin, vizita e parë presidenciale pas 25 vjetësh

KAJRO, 10 shtator /ATSH-DPA/ – Presidenti gjerman Frank-Walter Steinmeier ka nisur një vizitë tre-ditore në Egjipt.

Steinmeier dëshiron të nderojë dekadat e bashkëpunimit të ngushtë me vendin e Afrikës së Veriut dhe rolin e tij si ndërmjetës në konfliktin në Lindjen e Mesme. Është hera e parë në 25 vjet që një kryetar shteti gjerman viziton Egjiptin.

Steinmeier do të takohet me presidentin egjiptian Abdel Fattah al-Sisi. Përveç marrëdhënieve dypalëshe, ka të ngjarë të jetë temë diskutimi edhe konflikti në Lindjen e Mesme.

Së bashku me Katarin, Egjipti është ndërmjetësi më i rëndësishëm në rajon për një armëpushim në luftën e Gazës dhe lirimin e pengjeve izraelitë të mbajtur nga grupi palestinez Hamas, megjithëse negociatat janë aktualisht në një bllokim.

Steinmeier gjithashtu dëshiron të shpjegojë qëndrimin e Gjermanisë për konfliktin e Gazës gjatë bisedimeve të tij. Fakti që qeveria gjermane ka qëndruar kaq qartë në anën e Izraelit i ka kushtuar Gjermanisë besimin dhe simpatinë e saj në rajon.

Steinmeier do të shoqërohet nga një delegacion tregtar. Gjermania është partneri më i rëndësishëm tregtar i Egjiptit në Evropë. Më shumë se 250 kompani gjermane janë të pranishme në vend.

Gjermanët përbëjnë gjithashtu grupin më të madh të turistëve të huaj. /os/