KANADA – Eksperti ekonomik Carney do të pasojë Trudeau
NJU JORK, 10 mars /ATSH-DPA/- Ish-guvernatori i bankës qendrore Mark Carney është zgjedhur si kreu i ri i Partisë Liberale në Kanada, duke zëvendësuar kryeministrin Justin Trudeau.
Ekonomisti 59-vjeçar fitoi zgjedhjet për udhëheqjen e Partisë Liberale me 85,9% të votave, duke mbizotëruar ndaj rivales së tij kryesore, ish-zëvendëskryeministres, Chrystia Freeland.
Si pasardhësi i Trudeau, Carney pritet gjithashtu të marrë përkohësisht rolin e kryeministrit dhe të jetë kandidati kryesor i partisë së tij në zgjedhjet e reja të shumëpritura, brenda disa javësh.
Ish-kreu i bankave qendrore angleze dhe kanadeze hyri në garën për udhëheqjen e partisë me një axhendë qendrore të fokusuar në ekonomi.
Në luftën tregtare me Shtetet e Bashkuara të Amerikës, ai synon të vazhdojë kursin e rezistencës të vendosur të Trudeau.
Sipas një sondazhi nga transmetuesi CTV News, 40% e kanadezëve besojnë se Carney do të ishte politikani më i mirë për negociatat me Trump, dukshëm më shumë se mbështetja prej 26% për liderin konservator të opozitës, Pierre Poilievre.//a.i/