KIEV – Zelensky shpreh skepticizëm pas telefonatës Trump-Putin: Armëpushimi i pjesshëm do të ishte pozitiv
NJU JORK, 18 mars /ATSH/- Presidenti amerikan, Donald Trump zhvilloi sot një bisedë telefonike me Vladimir Putin në një përpjekje për të arritur një armëpushim midis Rusisë dhe Ukrainës, sipas “abcNews”.
Më herët, Shtëpia e Bardhë tha se Putini kishte mbështetur idenë e Trump për një pauzë të ndërsjellë në sulmet e infrastrukturës energjetike – por nuk përfshinte një angazhim për armëpushimin 30-ditor të pranuar nga Ukraina javën e kaluar, pavarësisht optimizmit të Trump ditëve të fundit se Moska do të pranonte.
“Të dy liderët ranë dakord që ky konflikt duhet të përfundojë me një paqe të qëndrueshme”, tha Shtëpia e Bardhë pas telefonatës Trump-Putin.
Ata theksuan gjithashtu nevojën për përmirësimin e marrëdhënieve dypalëshe midis SHBA-së dhe Rusisë.
“Ky konflikt nuk duhet të kishte filluar kurrë dhe duhej të kishte përfunduar shumë kohë më parë me përpjekje të sinqerta dhe të mirëbesimit për paqen”, shtoi Shtëpia e Bardhë.
Udhëheqësit ranë dakord që lëvizja drejt paqes do të fillonte me një armëpushim në objektivat e energjisë dhe infrastrukturës, si dhe negociata teknike për zbatimin e një armëpushimi detar në Detin e Zi, armëpushim të plotë dhe paqe të përhershme. Këto negociata do të fillojnë menjëherë në Lindjen e Mesme.
Presidenti ukrainas, Volodymyr Zelensky, në një konferencë për shtyp pas telefonatës Trump-Putin, shprehu “skepticizëm” – ndërsa tha se nëse do të kishte një armëpushim të pjesshëm, ky do të ishte një rezultat pozitiv.
Trump, në postimin e tij në media sociale e quajti bisedën disa orëshe shumë të mirë dhe produktive.
“Ne ramë dakord për një armëpushim të menjëhershëm në objektet e energjisë dhe infrastrukturës, me mirëkuptimin se do të punojmë shpejt për të pasur një armëpushim të plotë dhe, në fund të fundit, një FUND të kësaj lufte shumë të tmerrshme midis Rusisë dhe Ukrainës”, shkroi Trump.
“Trump dhe Putin folën gjithashtu për Lindjen e Mesme më gjerësisht, duke përfshirë Iranin”, tha Shtëpia e Bardhë.
“Të dy liderët ranë dakord se një e ardhme me një marrëdhënie të përmirësuar dypalëshe midis SHBA-së dhe Rusisë kishte një avantazh të madh. //a.i/