Kadastra e Vlorës: Verifikim dokumentacionit për kalim në pronësi të tokës bujqësore

TIRANË, 16 dhjetor/ATSH/ Kadastra e Vlorës po punon për plotësimin e dokumentacionit në disa blloqe për kalimin e tokës bujqësore nga përdorim në pronësi.

Sipas Agjencisë Shtetërore të Kadastrës, specialistët po kryejnë kontrollin e detajuar të dokumentacionit referuar përcaktimeve në kuadrin ligjor, verifikimet në terren për të përcaktuar me saktësi pozicionin dhe sipërfaqen e parcelave dhe afishimin publik të listave dhe trajtimin e çdo pretendimi apo ankese të qytetarëve.

Kadastra thotë se është në bashkëpunim të ngushtë me njësitë e qeverisjes vendore, prefekturat dhe Këshillat Bashkiakë për të siguruar finalizimin e këtij procesi.

Pasi kryhet verifikimi dhe shqyrtimi i dokumentacionit, dosjet përfundimtare delegohen për miratim pranë këshillave bashkiakë dhe prefektit.

Në përfundim të procedurës administrative, përfituesit pajisen me aktin individual të kalimit në pronësi, pa shpërblim, të tokës bujqësore. /j.p/

1 nga 2