Kamala Harris: SHBA s’do të lejojë zhvendosjen e detyruar të palestinezëve nga Gaza

Zëvendëspresidentja e Shteteve të Bashkuara të Amerikës Kamala Harris ka deklaruar se Uashingtoni nuk do të lejojë në asnjë rrethanë zhvendosjen e detyruar të palestinezëve nga Gaza ose Bregu Perëndimor, rrethimin e Gazës ose rivizatimin e kufijve të Gazës.

Harris e bëri këtë deklaratë gjatë një takimi me presidentin egjiptian Abdul Fattah al-Sisi, ku ajo e falënderoi atë për përpjekjet e tij për të evakuuar qytetarët amerikanë nga Gaza.

Gjatë takimit të tyre në Dubai, në margjinat e COP28, Harris tha se përpjekjet për paqe “mund të kenë sukses vetëm nëse ato ndiqen në kontekstin e një horizonti të qartë politik për popullin palestinez drejt një shteti të tyre të udhëhequr nga një Autoritet Palestinez i rigjallëruar”.

Harris e bëri të qartë se Hamasi nuk mund ta kontrollojë Gazën dhe SHBA-të do të mbeten të përkushtuara për të “ndjekur pa pushim” lirimin e të gjithë pengjeve në Gaza.

/rtsh.al/