Kampionati i varkave me vela, “Verve” fiton vendin e parë

Ka përfunduar me sukses edicioni i sivjetshëm i kampionati të varkave me vela “Regata Brindisi“.

Një garë e ngarkuar me emocion, që për të katërtin vit me radhë e ka kthyer Vlorën në pikë takimi të sportit detar evropian.

Rreth 30 varka me vela, të nisura nga Brindisi, mbërritën në Portin e Orikumit pas një udhëtimi prej afro 12 orësh në det të hapur. Fitues i çmimit të parë u shpall varka “Verve”.

Kapitenët e ekipeve e përshkruan garën si sfiduese dhe mbresëlënëse, ndërsa ceremonia e ndarjes së çmimeve do të mbahet në Vlorë.

“Lundrojmë bashkë prej shumë vitesh, të gjitha edicionet e kemi bërë këtë rrugë”, tha një ndër pjesëmarrësit.

“Është hera e parë dhe eksperienca ishte fantastike, ekuipazh jemi e gjithë familja dhe është shumë emocionuese”, u shpreh një tjetër garuse.

Vlora mirëpret këtë aktivitet prej katër vitesh, duke e kthyer në një traditë që promovon turizmin dhe e pozicionon qytetin si një destinacion elitar në Mesdhe.

/rtsh.al/