Kancelari gjerman Friedrich Merz: Evropa duhet të rishikojë interesat e saj ndaj SHBA dhe të kërkojë partnerë të rinj globalë
Europa duhet të rishikojë interesat e saj në raport me Shtetet e Bashkuara dhe të forcojë marrëdhëniet me partnerë të rinj në botë, deklaroi kancelari gjerman Friedrich Merz gjatë fjalës së tij në takimin vjetor të rreth 230 ambasadorëve gjermanë në Berlin. Samiti këtë vit u mbajt nën moton: “Siguri, Liri, Mirëqenie.”
Merz theksoi se bashkëpunimi transatlantik me SHBA-të nuk është më i mirëkuptuar si dikur, por do të varet nga rrethanat dhe interesat e ndërsjella.
“Ne në Evropë duhet të rishikojmë interesat tona – pa ndjenja nostalgjie. SHBA mbetet një partner i rëndësishëm, por marrëdhënia nuk është më automatike si dikur,” – u shpreh kancelari.
Ai theksoi se Evropa duhet të bëhet më agresive në ndërtimin dhe zgjerimin e partneriteteve globale, ndërsa po përballet me një botë që ndryshon me shpejtësi.
“Kjo do të thotë se duhet të kërkojmë partnerë të rinj në mbarë botën dhe të forcojmë marrëdhëniet ekzistuese më shumë se kurrë më parë.”
Merz shtoi se Gjermania, në bashkëpunim me partnerët evropianë, do të punojë për ndërtimin e një sistemi global të bazuar në parime të përbashkëta dhe që promovon tregtinë e lirë – edhe me SHBA-të.
Për Rusinë: Planet e Putinit nuk ndalen në Ukrainë
Duke folur për agresionin rus, Merz përsëriti se nuk ka asnjë shenjë që ambiciet e Vladimir Putinit do të ndalen me Ukrainën.
“Të gjitha tregojnë se planet imperialiste të Putinit nuk ndalen në pushtimin e Ukrainës – përkundrazi, atje fillojnë,” – paralajmëroi kancelari.
Politikat e brendshme dhe të jashtme janë të pandashme
Në një mesazh të drejtpërdrejtë për diplomatët gjermanë, Merz theksoi se sot nuk ka më ndarje të qartë mes politikës së brendshme dhe asaj të jashtme.
“Nuk mund të flasim më për politikë të brendshme dhe të jashtme si dy fusha të ndara. Ky iluzion krijon një ndjenjë të rreme sigurie dhe shërben vetëm për të justifikuar izolimin. Luftërat, shkelësit e ligjit dhe agresorët nuk janë çështje të largëta.”
Sipas tij, Gjermania nuk është një ishull, edhe pse e rrethuar nga miq dhe aleatë.
“Lidhjet tona të ngushta me partnerët evropianë tregojnë qartë se sa thellë janë të ndërthurura vendimet tona të politikës së brendshme me ato të politikës së jashtme.”