Kapiten Arben Anamali u shpall “Dëshmor i Atdheut” pas aktit heroik në Liqenin e Shkodrës, ministri Vengu i dorëzon titullin familjes

Ministri i Mbrojtjes, Pirro Vengu, i dorëzoi të martën titullin “Dëshmor i Atdheut” familjes së kapitenit Arben Anamali, i cili humbi jetën më 8 korrik duke shpëtuar dy turistë të huaj nga mbytja në Liqenin e Shkodrës. Trupi i pajetë i kapiten Anamalit u gjet më 10 korrik.

Gjatë vizitës në familjen Anamali, ministri Vengu shoqërohej nga kryetari i bashkisë së Shkodrës, Benet Beci, dhe prefektja Majlinda Angoni.

“Nderuam kujtimin e profesionistit të përkushtuar, mikut të dashur dhe prindit shembullor, që me aktin e tij fisnik u bashkua me heronjtë e pavdekshëm të Kombit,” shkroi Vengu në rrjetet sociale. “Sakrifica e Arbenit nuk është vetëm një shembull guximi, por një dëshmi e gjallë e shpirtit shqiptar që vendos jetën e tjetrit mbi të vetën prandaj nga sot ai rreshtohet mes ‘Dëshmorëve të Atdheut’.”

Ky titull nderon aktin e jashtëzakonshëm të kapiten Anamalit, i cili dha jetën për të shpëtuar të tjerët.

/rtsh.al/