Qeveria përditëson listën e operatorëve të infrastrukturës kritike dhe të rëndësishme kibernetike
Në zbatim të ligjit “Për sigurinë kibernetike” dhe metodologjisë përkatëse, Këshilli i Ministrave ka miratuar listën e përditësuar të operatorëve të infrastrukturave kritike dhe të rëndësishme të informacionit. Kjo lëvizje vjen në një kohë kur siguria kibernetike është bërë thelbësore për mbrojtjen e funksioneve kyçe të shtetit dhe shoqërisë.
Infrastruktura e përditësuar përfshin gjithsej 215 operatorë në nivel kombëtar, të ndarë si më poshtë:
133 operatorë janë klasifikuar si infrastrukturë kritike.
82 operatorë janë klasifikuar si infrastrukturë e rëndësishme e informacionit.
Lista e përditësuar mbulon një gamë të gjerë sektorësh, duke përfshirë:
Energjinë
Infrastrukturën financiare
Transportin
Furnizimin me ujë të pijshëm
Ofruesit e shërbimeve dixhitale
Arsimin
Turizmin
Mediat, etj.
Sipas njoftimit për shtyp, procesi i identifikimit është zhvilluar nga Autoriteti Kombëtar për Sigurinë Kibernetike (AKSK) përmes një metodologjie të strukturuar dhe gjithëpërfshirëse. Sipas AKSK-së, ky proces ka përfshirë identifikimin e sektorëve dhe nënsektorëve me kritikalitet të lartë; konsultimin me autoritetet rregullatore përkatëse; shpërndarjen e pyetësorëve të vetëdeklarimit; analizën e të dhënave në përputhje me kriteret e përgjithshme dhe sektoriale.
Përgjegjësitë dhe mbështetja për operatorët
Të gjithë operatorët e përfshirë në këtë listë bëhen pjesë e një strukture të qëndrueshme dhe të mbikëqyrur në vazhdimësi nga AKSK. Kjo përfshirje sjell detyrime dhe përfitime të rëndësishme, duke përfshirë akses në asistencë teknike dhe mbështetje metodologjike për ndërtimin e politikave të sigurisë; trajnime për rritjen e kapaciteteve të brendshme; Detyrime ligjore për zbatimin e masave të sigurisë dhe raportimin e incidenteve kibernetike.
Përfshirja e këtyre operatorëve në këtë strukturë përfaqëson një përgjegjësi strategjike për të mbrojtur funksionet thelbësore të shtetit dhe shoqërisë në një realitet gjithnjë e më të lidhur dixitalisht, si dhe një detyrim ligjor në përputhje me kuadrin rregullator në fuqi.
/rtsh.al/