Kina po përjeton rënie të ndjeshme të popullsisë
Kostoja e arsimimit, refuzimi në rritje i martesës apo edhe migrimi ishin ndër arsyet e qenësishme të rënies së numrit të popullsisë kineze, që u përshpejtua edhe në vitin 2023, sipas të dhënave zyrtare të publikuara të mërkurën, çka zgjat një rënie që filloi në vitin 2022, pas gjashtë dekadash rritjeje.
Sipas OKB-së për një kohë të gjatë, vendi më i populluar në botë, Kina humbi titullin e saj ndaj Indisë vitin e kaluar.
Kjo prirje rënëse pritet të vazhdojë edhe gjatë dekadave të ardhshme.
Përballë krizës së parashikuar demografike, qeveria po kërkon rritjen e nivelit të lindjeve dhe autoritetet lokale tani po paguajnë më shumë ndihma familjare – të cilat mbeten modeste dhe pa shumë efekt për momentin.
”Në fund të vitit 2023, popullsia kombëtare ishte 1 409 670 000 banorë ose një rënie prej 2,08 milionë krahasuar me fundin e vitit 2022”, njoftoi të mërkurën Byroja Kombëtare e Statistikave (NBS).
Rënia e vitit të kaluar ishte më shumë se dyfishi i vitit 2022, kur vendi humbi 850 000 banorë dhe popullsia e tij u tkurr për herë të parë që nga vitet 1960.
Shifra përfshin vetëm individë me kombësi kineze që banojnë në territorin e Kinës. Ai nuk përfshin të huajt ose banorët e territoreve gjysmë autonome të Hong Kongut dhe Makaos.
“Në vitin 2023, numri i lindjeve ishte 9,02 milionë”, njoftoi gjithashtu BNS të mërkurën, një shifër më poshtë krahasuar me 9,56 milionë në 2022.
/ rtsh.al /