Koncert për mbretin e Pop-it, në Durrës
TIRANË, 14 qershor/ATSH/ Orkestra simfonike e TKOB realizoi mbrëmë koncertin “Michael Jackson: Historia dhe legjenda e mbretit të pop-it”, në sheshin “Rezistenca” të qytetit të Durrësit. Orkestra interpretoi nga “Thriller”, “Beat it”, “Heal the World” e deri te “Billie Jean”, duke përcjellë për të pranishmit e shumtë hitet më të njohura të “mbretit” të muzikës Pop.
Në skenë janë ngjitur dhe dy solistët Clarissa Vichi dhe Mattia Sciascia, ndërsa koncerti u dirigjua nga mjeshtri italian Roberto Molinelli.
Koncerti i solli Durrësit një atmosferë elektrizuese duke bërë që publiku i mbledhur në sheshin “Rezistenca” të këndojë e vallëzojë së bashku me artistët.
Ky ishte një rikthim për kompozitorin dhe dirigjentin e famshëm italian Roberto Molinelli, i cili ishte edhe në dy koncertet që korrën sukses të jashtëzakonshëm në TKOB, “Queen: Show must go on” dhe “Paganini in Jazz”. Sonte në orën 20:00, koncerti kushtuar Michael Jackson do të shfaqet në sallën e TKOB.
1 nga 7/r.e/