Kosovë, miratohet ligji për amnistinë
Kuvendi i Kosovës me 91 për, 17 kundër dhe asnjë abstenim miratoi në parim Projektligjin për Amnistinë.
Të gjitha partitë politike në Kuvendin e Kosovës e kanë përkrahur këtë projektligj, me përjashtim të lëvizjes Vetëvendosje, e cila vlerësoi se ai është në kundërshtim me interesat e qytetarëve të Kosovës.
Behar Selimi nga Grupi parlamentar i PDK-së theksoi se ky grup është pro projektligjit për amnisti pasi mendojnë se me këtë po i shpërbëjnë strukturat paralele dhe po mundësojnë integrimin e qytetarëve serbë.
Ai tha se e përkrahin projektligjin, pasi kanë arritur konsensus të hiqet neni 3.
Edhe Haki Demolli nga Grupi parlamentar i LDK-së tha se LDK përkrah aprovimin e këtij ligji. Sipas tij, ligji është ndërmarrë në kuadër të zbatimit të marrëveshjes Kosovë-Serbi. Arsyeja e dytë pse përkrahet ligji tha se ka të bëjë me atë se është hequr neni 3, kërkesë kjo edhe e LDK-së.
Ndryshe, nga PDK, LDK, AAK e AKR, mendojnë deputetët e Vetëvendosjes.
Albulena Haxhiu nga Vetëvendosje deklaroi se projektligji për amnisti është në kundërshtim me interesat e qytetarëve. Sipas saj, me largimin e nenit 3 projektligji nuk ka pësuar ndryshime substanciale.
Ajo tha se me këtë projektligj janë shpërfillur të gjitha procedurat e Kuvendit, vetëm për tu ndier mirë Dacic dhe kjo sipas saj është për të ardhur keq.
Për të tepër sipas saj, projektligji është edhe në kundërshtim me Kushtetutën.