Kryeministri Berisha i dërgon mesazh ngushëllimi Kryeministrit turk Erdogan për fatëkeqësinë tragjike të shkaktuar nga tërmeti

Kryeministri Berisha i dërgoi një mesazh ngushëllimi Kryeministrit turk Recep Tayyip Erdogan për fatkeqësinë tragjike, të shkaktuar nga tërmeti që goditi rajonin jugperëndimor të Turqisë.

Në mesazhin e tij, Kryeministri shkruan:

“I dashur zoti Kryeministër,

Me keqardhje të thellë kam mësuar për fatkeqësinë tragjike, të shkaktuar nga tërmeti që goditi rajonin jugperëndimor të Turqisë, si pasojë e të cilit kanë humbur jetën me qindra qytetarë të vendit Tuaj mik dhe janë plagosur shumë të tjerë, pa përmendur dëmet e konsiderueshme materiale. Më lejoni, që, në emrin tim, të qeverisë shqiptare dhe të të gjithë shqiptarëve, t’Ju dërgoj juve e përmes Jush familjeve të viktimave, qeverisë dhe popullit mik turk ngushëllimet më të sinqërta e vëllazërore për humbjet e jetëve njerëzore.

Në këto çaste hidhërimi, shqiptarët ndodhen pranë Jush dhe kombit Tuaj mik për të ndarë së bashku dhimbjen e madhe e për t’u lutur që shpirtat e viktimave të kësaj tragjedie të rëndë të prehen në paqe.

Me sigurimet e konsideratës më të lartë,

Juaji

SALI BERISHA”