“Kthejini Zërin Grave Afgane”, Spiropali nënshkruan deklaratën e përbashkët së bashku me 20 gra kryeparlamentare

TIRANË, 25 nëntor/ATSH/  Kryetarja e Kuvendit, Elisa Spiropali, ka nënshkruar deklaratën e përbashkët “Kthejini Zërin Grave Afgane” së bashku me 20 gra kryeparlamentare. Mes nënshkrueseve të deklaratës është Presidentja e Parlamentit Europian,  Roberta Metsola, kryeparlamentarja e Francës, Yawl Braun-Pivet, Presidentja e Kongresit të Deputetëve të Spanjës, Francina Armengol, etj. Në deklaratë theksohet angazhimi i përbashkët për të mbrojtur të drejtat e grave kudo që janë të nëpërkëmbura dhe të shtypura, beteja për barazi, dinjitet dhe liri, si betejë e të gjitha grave për njerëzimin tonë të përbashkët. “Domosdoshmëri e të drejtave themelore dhe barazisë, të cilën Unioni Ndër-parlamentar, “Parlamenti i Parlamenteve” ka mbështetur vazhdimisht, është që kërkoi shfuqizimin e “ligjit për veset dhe virtytet” menjëherë sapo u miratua. Ne, nga ana jonë, i bëjmë thirrje regjimit taliban të shfuqizojë menjëherë këtë dekret dhe të gjitha ligjet e tjera diskriminuese”, theksohet në deklaratë. Në deklaratë theksohet gjithashtu se situata e grave afgane do të jetë në agjendën e diskutimeve në parlamentet e këtyre vendeve, që drejtohen nga kryeparlamentaret. “Në Ditën Ndërkombëtare për Eliminimin e Dhunës Ndaj Grave duam të ndërmarrim një angazhim të qartë: ne nuk do t’i braktisim kurrë gratë afgane. Do të vazhdojmë të jemi zëri i atyre që u mbyllet goja. Në të gjitha nivelet, situata e grave afgane do të jetë në agjendën e diskutimeve në parlamentet tona. Edhe Samiti i dytë i Grave Kryeparlamentare, në Quebec, do të na japë mundësinë për të forcuar më tej mobilizimin tonë të përbashkët”, thuhet në deklaratën e përbashkët. /k.s/j.p/