Kumbaro: Rana e Hedhun, mrekullia e natyrës në bregdetin Adriatik
TIRANË, 21 korrik /ATSH/ Ministrja e Turizmit dhe Mjedisit, Mirela Kumbaro ndau sot pamje nga plazhi i Ranës së Hedhun në Shëngjin.
“Rana e Hedhun, mrekullia e natyrës në bregdetin Adriatik”, u shpreh ministrja Kumbaro.
“Rana e Hedhun” është një plazh i mbrojtur që vazhdon të mbërthejë kuriozitetin e vizitorëve dhe pushuesve, pasi duket sikur rëra ka nisur udhëtimin e saj drejt malit.
Ndodhet 2.5 km nga qyteti i Shëngjinit, në bashkinë e Lezhës, dhe vlerësohet si një gjeomonument i rrallë.
Monumenti i Natyrës, Rana e Hedhun, vendi ku dunat e rërës shkrihen së bashku me detin. Një destinacion unik, me gjatësi 600 m dhe gjerësi 100 m, pozicionuar rrëzë malit të Rencit. Rana e Hedhun njihet edhe për vlerat e saj shkencore gjeomorfologjike, didaktike dhe turistike.
Ky plazh të jep një pamje që nuk e ndesh askund përgjatë bregdetit Adriatik. Aty takohet rëra gri me detin e kaltër, ndërsa nuk mungojnë edhe shkëmbinjtë që zbresin nga mali dhe derdhen në det.
/r.e/