Kurti: Serbia kërkon të sabotojë institucionet tona, ka shënjestruar deputetë të pakicave joserbe
Kryeministri në detyrë, Albin Kurti, ka deklaruar se pas ndërhyrjes në zgjedhjet parlamentare të 9 shkurtit në Kosovë, Serbia po vazhdon përpjekjet për sabotimin e konsolidimit të institucioneve të dala nga këto zgjedhje.
“Pas ndërhyrjes në zgjedhjet parlamentare të 9 shkurtit 2025 në Republikën e Kosovës, për çfarë kemi informuar në konferencë për media bashkë me ministrin Nenad Rashiq me datë 9 mars 2025, Serbia po vazhdon përpjekjet për sabotimin e konsolidimit të institucioneve të dala nga këto zgjedhje”, shkruan në rrjetin social në Facebook.
Kurti thekson se Serbia po ofron mbështetje për Listën Serbe dhe Milan Radoiçiq, i cili është i përfshirë në aktivitete kriminale.
“Presidenti i Serbisë, Vuçiq, ua ka dhënë në dispozicion burimet dhe mjetet shtetërore për këtë Listës Serbe dhe kryeterroristit Millan Radoiçiq, i cili në agresionin kriminal e terrorist të Banjskës, më 24 shtator 2023, ishte nënkryetar “de jure” i Listës Serbe, kurse tani është kryetar “de facto” i këtij subjekti politik. Në shënjestër janë disa deputetë të pakicave joserbe”, shkroi Kurti në Facebook.
Kryeministri Kurti vë në dukje se institucionet e sigurisë kanë informacion të konfirmuar lidhur me këto veprime dhe se kjo çështje u shqyrtua në mbledhjen e Këshillit të Sigurisë së Kosovës.
/rtsh.al/