Kush është Arbel Yehud, pengu izraelit në qendër të mosmarrëveshjeve Irael- Hamas?

Mijëra palestinezë të zhvendosur po presin me ankth që Izraeli të zhbllokojë një rrugë kyçe në Gaza, në mënyrë që ata të kthehen në veri. Por rihapja është vonuar, me Izraelin që më herët paralajmëroi Gazanët se nuk do të lejohen të udhëtojnë në veri derisa të bëhen planet për lirimin e civiles izraelite, Arbel Yehud.

Yehud, 29, u mor peng më 7 tetor 2023 nga persona të armatosur të Hamasit nga Kibbutz Nir Oz me të dashurin e saj, Ariel Cunio, 27 vjeç. Vëllai i saj, Dolev Yehud, u vra gjatë sulmit dhe eshtrat e tij u identifikuan nga forcat izraelite qershorin e kaluar.

Izraeli fillimisht priste që Yehud, një civile, të ishte një nga katër pengjet e përfshira në shkëmbimin e dytë, por Hamasi konfirmoi të premten se ushtarët Karina Ariev, Daniella Gilboa, Naama Levy dhe Liri Albag, do të liroheshin.

Kushtet e armëpushimit parashikonin se të gjitha pengjet civile femra do të liroheshin para ushtarëve femra.

Pak më herët, një burim i Hamasit i tha BBC-së se grupi i kishte dhënë Egjiptit dëshmi se Yehud është gjallë “dhe do të lirohej të shtunën e ardhshme” me grupin tjetër të pengjeve që do të liroheshin

Hamasi thotë se Izraeli po “zvarrit këmbët” duke vazhduar të bllokojë hyrjen në një rrugë kyçe në Gaza, e cila do të lejonte palestinezët e zhvendosur të kthehen në lagjet e tyre në veri.

Në një deklaratë, grupi thotë se Izraeli po vonon zbatimin e armëpushimit “duke vazhduar të mbyllë rrugën Al-Rashid dhe duke parandaluar kthimin e këmbësorëve të zhvendosur nga jugu në veri”.

Hamasi thotë se e mban Izraelin “përgjegjës për çdo ndërprerje në zbatimin e marrëveshjes dhe pasojat e saj” në fazat e tjera të armëpushimit.

Një nga kushtet e përfshira në marrëveshjen e armëpushimit që Hamasi dhe Izraeli arritën në fillim të këtij muaji është tërheqja e pjesshme e trupave izraelite nga zonat e populluara dhe Korridori Netzarim, një zonë ushtarake që pret veriun e Gazës.

Një prani ushtarake do të mbetet në zonat kufitare të Gazës si Korridori jugor i Filadelfit. Komiteti Ndërkombëtar i Kryqit të Kuq (KNKK) ka njoftuar se faza e dytë e operacionit të çlirimit të pengjeve ka përfunduar.

Në një deklaratë, KNKK përshkruan rolin e saj në këtë proces. Ajo thotë se pas transferimit të katër pengjeve nga Gaza te autoritetet izraelite, KNKK ndihmoi në lehtësimin e lirimit dhe transferimit të 128 të burgosurve nga qendrat izraelite të paraburgimit në Gaza dhe Bregun Perëndimor. Kjo pason intervistat para nisjes për të konfirmuar identitetet dhe për të vlerësuar shëndetin dhe aftësinë për udhëtim.

Ata gjithashtu kanë kryer intervista para nisjes me të burgosurit përpara një lirimi dhe transferimi të veçantë të rregulluar nga autoritetet izraelite.

Organizata konfirmon se gjithsej 200 të burgosur u liruan sot. Kryqi i Kuq shton se, krahas operacioneve të çlirimit, po punon me partnerët për të ofruar më shumë ndihma në Gaza. BBC

/rtsh.al/