Kush po tenton t'i zhvasë biznesmenët? Mashtruesit që hiqen si zyrtarë të shtetit dhe kërkojnë milionat, dy rastet që parandaloi Policia

Bedri dhe Albert Vodha, babë e bir, janë lënë në burg nga togat e zeza të Tiranës pasi kanë tentuar t'i marrin përmes mashtrimit një shumë prej 100 mijë eurosh një biznesmeni ndërtimi. Në kërkim është shpallur dhe i akuzuari si organizator, shtetasi Florian Gjergji.

Newsbomb.al mëson se ka qenë fillimisht Gjergji ai që i është prezantuar biznesmenit të njohur të ndërtimit si zyrtar i lartë i shtetit. Madje, ai ka përdorur emrin e një politikani të lartë në kryeqytet, duke i thënë se i duheshin 100.000 euro.

Këto komunikime janë zhvilluar në aplikacionin "Telegram", i përdorur kryesisht për komunikime "sekrete" dhe i njohur për sigurinë e lartë. Florian Gjergji i ka shkruar biznesmenit të ndërtimit Ramë Geci me një numër anglez, duke i thënë se i duheshin lekët në këtë periudhë zgjedhore.

“Lali jam, e di si e kam situatën në këto kohë, a ke mundësi për 100?”,- shkruhej në mesazh.

Mirëpo, pas verifikimeve që biznesmeni ka kryer privatisht, ka mësuar se personi që po i shkruante në anën tjetër të telefonit nuk ishte politikani që pretendohej dhe ka vënë në dijeni Policinë e Shtetit. Janë vënë në lëvizje disa drejtori të rëndësishme dhe Forca Operacionale, të koordinuara nga Drejtoria Qëndrore e Policisë së Shtetit dhe biznesmeni është udhëzuar të vazhdojë komunikimin.

"Nuk i kam 100, 70 të bëjnë punë?", i ka thënë Geci shtetasit Florian Gjergji, duke ndjekur udhëzimet e agjentëve. Organizatori i kësaj veprimtari ka rënë dakord dhe ka dërguar në zyrat e kompanisë së këtij biznesmeni babë e birë, shtetasit Bedri dhe Albert Vodha. Sapo kanë marrë qesen me para, ka ndërhyrë Operacionalja dhe i ka prangosur në kushtet e flagrancës.

Kaq fatlum nuk ka qenë në biznesmeni tjetër i ndërtimit Pëllumb Salillari. Ky i fundit është mashtruar të paktën katër herë dhe vetëm herën e fundit ka arritur të kuptojë se kishte të bënte me një grup personash që pretendonin se ishin zyrtarë të shtetit.

Mbrëmjen e 5 janarit 2023, rreth orës 22:30 të mbrëmjes në aplikacionin “Signal” në telefonin e biznesmenit Pëllumb Salillari, mbërriti një mesazh nga një kontakt me emrin “Edi”.

Biznesmeni i është përgjigjur pas disa minutash me fjalët “Mire shef si jeni?”, duke treguar se e ka njohur dërguesin e atij mesazhi. Pas përgjigjes, kontakti me emrin “Edi” ia kthen “Doja me të thënë dicka, por po i them dikujt tjetër”.

Këtu, Pëllumb Salillari kupton se po tentonin ta mashtronin dhe vendosi të njoftonte Policinë dhe të rrëfente gjithçka po i ndodhte. Nga hetimi rezultoi se shtetasit Jasmin Pepaj, Rezart Pepaj dhe Sherif Kadroviç kishin mundur të ndërhynin në rrjetin Signal dhe t’i shkruanin biznesmenit të njohur. Këto mesazhe atij i shfaqeshin me dërgues kontaktin me emrin “Edi”.

Në fakt, në të vërtetë bëhej fjalë për një numër anglez që personat e përdornin për të zhvatur para nga biznesmenë të ndryshëm. Policia i kërkoi Salillarit të vijonte bisedën dhe të linte takim me personat që i shkruanin.

Salillari i shkruan më tej tekstshkruesit: Më thuaj të lutem pa problem.

Personi i shkruan: Ia jep dot robit 150 000 euro dhe rregullohemi.

Për të bërë të mundur arrestimin e mashtruesve Salillari udhëzohet të lërë takim me ta. Me vendim të Prokurorisë së Tiranës u tërhoq nga llogaria e Ministrisë së Brendshme shuma prej 150.000 eurosh, brenda së cilës u vendos GPS për ta gjurmuar. Në momentin e takimit, sikurse ishte lënë mes palëve, në shtëpinë e biznesmenit Pëllumb Salillari mbërrin një person dhe merr lekët.

Kur të dyshuarit po largoheshin, Policia ndërhyri dhe bëri arrestimin në kushtet e flagrancës, bashkë me paratë që sapo kishin marrë. Në shtëpitë e autorëve Jasmin Pepaj, Rezart Pepaj dhe Sherif Kadroviç janë kryer kontrolle dhe u gjetën shuma të konsiderueshme parash, mbi 120.000 euro, të cilat të dyshuarit nuk i justifikojnë dot dhe ka dyshime se këtë aktivitet kriminal e kanë kryer edhe ne raste të tjera.

Por kush po tenton t'i zhvasë biznesmenët e fuqishëm shqiptarë, kush qëndron pas këtyre personave që duket se janë thjesht "kukulla"?! Në rastin e mashtrimit të biznesmenit Pëllumb Salillari, një prej të arrestuarëve rezulton se ishte berber në fshatin Shtoj i Vjetër dhe një i njohur i tij i kishte shkruar nga Anglia, duke i kërkuar t'i merrte "një porosi".

Duket se këta persona e kanë bërë rrugë përdorimin e numrave anglez dhe shantazhimin e biznesmenëve në aplikacione në internet, si "Signal" apo "Telegram". Policia e Shtetit në të dy rastet, i ka ftuar qytetarët dhe biznesmenët që të denoncojnë këto raste shantazhi e mashtrimi.

Sondazh

A e mbështesni protestën siç është zhvilluar dy ditët e fundit nën emrin e studentëve?

•                                                                         Po
  

  •                                                                     Jo
    

    •                                                                 Nuk e di
      

Lexo gjithashtu