Kuvendi i rekomandon SPAK-ut: Fokusi, tek hetimet mbi krimet zgjedhore

TIRANË, 3 korrik/ATSH/ Kuvendi miratoi sot një projektrezolutë për vlerësimin e veprimtarisë së Strukturës së Posaçme Kundër Korrupsionit dhe Krimit të Organizuar (SPAK) për vitin 2024, duke vendosur një fokus të veçantë mbi hetimet për krimet zgjedhore.

Në raportin e paraqitur nga SPAK për vitin 2023, Kuvendi vlerësoi pozitivisht rezultatet në luftën kundër krimit të organizuar dhe korrupsionit. Kuvendi thekson rëndësinë e hetimeve proaktive dhe përdorimit të teknikave të avancuara hetimore për të përballuar krimet zgjedhore, të cilat janë të një rëndësie të veçantë për publikun.

Në draft, renditen 10 kërkesat e Kuvendit për SPAK-ut. Ligjvënësit kërkojnë hetime financiare për rastet e krimit të organizuar, trafikut të paligjshëm, terrorizmit dhe pastrimit të parave, hetimet për kriptovalutat.

Rekomandimet e Kuvendit për SPAK për vitin 2024:

1. Të hartohet një strategji e posaçme për prioritizimin e çështjeve dhe procedimeve të mbartura;
2. Të intensifikohen hetimet paralele financiare për rastet e krimit të organizuar, trafikut të paligjshëm, terrorizmit dhe pastrimit të parave.
3. Të vijojë angazhimin në sigurimin e aplikimit të uniformizuar të standardeve të hetimit dhe ndjekjes penale, duke garantuar barazinë para ligjit.
4. Të vijohet me forcimin e kapaciteteve njerëzore dhe teknike me fokus hetimet financiare e të kriptovalutave.
5. T’i kushtohet vëmendje krimeve zgjedhore, veçanërisht fakteve të bëra publike në media para, gjatë dhe pas procesit zgjedhor, për të filluar hetimin kryesisht në rastet kur ka njoftime publike për kryerjen e një vepre penale.
6. Të tregohet një vëmendje e shtuar ndaj denoncimeve që vijnë nga publiku si dhe të rritet numri i hetimeve të kryera nga prokurorët e Prokurorisë së Posaçme për çështje me ndjeshmëri të lartë publike.
7. Të angazhohet në plotësimin e vakancave me qëllim funksionimin në eficencë të plotë të Prokurorisë së Posaçme dhe Byrosë Kombëtare të Hetimit.
8. Të përmbyllë procesin e hartimit dhe miratimit të akteve të tjera nënligjore të cilat rezultojnë pa miratuar, për të përfunduar plotësimin e kornizës strategjike institucionale.
9. Të angazhohet në pilotimin dhe testimin e Sistemit të Menaxhimit të Çështjeve, me qëllim vënien në efiçencë brenda vitit 2024, duke pasur parasysh rëndësinë e këtij sistemi në punën e Prokurorëve dhe Hetuesve të strukturës.
10. Të angazhohet në përmbushjen me efektivitet të detyrimeve institucionale në kuadër të raportimeve gjatë procesit të integrimit në Bashkimin Europian.