LDK: Presidente, mundesh me dhënë dorëheqje
Presidentja e vendit në një intervistë për radion “Evropa e lirë”, ka thënë se është faktor uniteti dhe sipas saj nuk i lejohet dorëheqja, pasi që nënkupton procedurë tjetër të zgjedhjeve dhe ushtrues detyre të Presidentit të vendit.
“Unë jam faktor uniteti dhe nuk më përket të mbaj njërën anë, apo të përkrah qëndrimin e njërës apo dy partive politike. Asnjëherë nuk është paraparë dorëheqja e Presidentit të vendit dhe mua nuk më lejohet të jap dorëheqje, sepse kjo do të nënkuptonte procedurë tjetër të zgjedhjeve dhe ushtrues detyre të Presidentit të vendit”, ka thënë Jahjaga.
Por me këtë nuk pajohet Sekretari i Përgjithshëm i LDK-së, Ismet Beqiri, i cili ka thënë nëpërmjet telefonit për Kosovapress se qëndrimi i LDK-së, është që marrëveshja duhet të realizohet.
“Unë po e përsëris edhe njëherë qëndrimin e Lidhjes Demokratike të Kosovës, po e them shumë qartë, që ne jemi që të zbatohet marrëveshja e arritur mes liderëve nën garancën e ish-ambasadorit Dell, e cila pastaj është shndërruar në rezolutë të Kuvendit të Kosovës. Ne insistojmë dhe do të mbajmë këtë qëndrim, që kjo marrëveshje të implementohet, dhe marrëveshja i parasheh qartë se si kjo të bëhet, kur ka të bëjë me Presidenten dhe absolutisht kjo që thuhet ‘nuk mund të jap dorëheqje’, dihet kur mund të jap dorëheqje dhe pse mund të jap dorëheqje, dhe nuk ka asnjë diskutim. Mirëpo e ka edhe obligim të hap rrugë për implementim të marrëveshje”, ka thënë Beqiri.
Ai ka thënë se Presidentja e ka shprehur unitetin e qytetarëve deri në një kohë, por tash një subjekt i fuqishëm politik kërkon të respektohet marrëveshja e arritur.
Madje Beqiri thotë se Presidentja nuk mund të thotë se nuk i lejohet dorëheqja dhe në anën tjetër të thotë është për respektimin e marrëveshjes, po që se merren vesh liderët.
“Kjo është ajo pjesa që është dykuptimësia, në njërën anë thotë që unë nuk mund të jap dorëheqje, në njërën anë e respektoi marrëveshjen po që se bisedojnë liderët. Nuk kanë çka bisedojnë liderët, por vetëm duhet të implementohet marrëveshja, dhe implementimi i marrëveshjes përcakton qartë në çfarë kohe duhet të bëhet amandamentimi i Kushtetutës që ka të bëjë me Presidenten, duhet të mbahen zgjedhjet dhe kësaj i paraprin akti i dorëheqjes”, ka thënë ai.
Ndryshe Lidhja Demokratike e Kosovës ka deklaruar që po që se nuk respektohet marrëveshje, ajo nuk do të votojë ndryshimet kushtetuese që kanë të bëjnë me kompetencat e Presidentit./Kosovapress/
Jahjaga: Nuk më lejohet të jap dorëheqje
“Asnjëherë nuk është paraparë dorëheqja e presidentit të vendit dhe mua nuk më lejohet të jap dorëheqje, sepse kjo do të nënkuptonte procedurë tjetër të zgjedhjeve dhe ushtrues detyre të presidentit të vendit”, ka thënë presidentja e Republikës së Kosovës, Atifete Jahjaga, në një intervistë dhënë Radios Evropa e Lirë.
RADIO EVROPA E LIRË: Është paralajmëruar një dialog politik ndërmjet Kosovës dhe Serbisë. Me çfarë parakushtesh do të hyjë Prishtina në këtë dialog dhe cilat janë temat që do të mund të shtroheshin në të?
ATIFETE JAHJAGA: Republika e Kosovës është shtet sovran, është shtet i pavarur dhe ka integritetin e plotë territorial; vendos marrëdhënie me të gjitha shtetet tjera si subjekt ndërkombëtar dhe i barabartë.
Si subjekt i tillë do të jetë edhe në çdo raport dhe në çdo marrëdhënie edhe me Republikën e Serbisë. Si dy shtete fqinje ne duhet t’i normalizojmë marrëdhëniet mes dy shteteve tona, duke vendosur edhe raporte diplomatike.
Në marrëdhëniet midis shteteve, zakonisht dialogohet për të gjitha çështjet që janë në interes të të dyja shteteve, duke e shprehur me nënshkrimin e marrëveshjeve bilateral ndërkombëtare. Me dialog politik nënkuptoj vullnetin dhe gatishmërinë e shprehur midis dy shteteve për të zgjidhur dhe për të arritur marrëveshje për cilëndo çështje.
RADIO EVROPA E LIRË: A ka Prishtina zyrtare plan ose strategji të veprimit në bisedimet me Beogradin zyrtar?
ATIFETE JAHJAGA: Jo. Nuk ka nevojë të ketë as plan dhe as strategji, sepse siç e dini, për Republikën e Kosovës strategjia është përcaktuar me aktin e pavarësisë së shtetit tonë. Veprimi konkret është veprim institucional, që ngërthen apo përfshin në vete, edhe programin e qeverisë së Kosovës, veprimet dhe punën e Kuvendit të Republikës së Kosovës…
Për ta përmbledhur me një fjali, është zbatimi i plotë i Kushtetutës dhe ligjeve të Republikës së Kosovës.
RADIO EVROPA E LIRË: Çështja që thuhet të jetë më e vështirë për të biseduar është ajo e veriut të vendit. Ka shumë opsione për veriun, përfshirë edhe atë të statusit special dhe autonominë. Sa është e gatshme Prishtina zyrtare të hyjë në bisedime me Beogradin për këtë çështje, duke marrë parasysh kërkesat për një status të posaçëm atje?
ATIFETE JAHJAGA: Shteti ynë, Republika e Kosovës, asnjëherë dhe me askend, nuk do të bisedojë për asnjë pjesë të territorit tonë, pra për sovranitetin tonë. Do të ketë dialog të brendshëm me qytetarët dhe përfaqësuesit e tyre legjitim, do të ketë dialog edhe me qytetarët serbë në të trija komunat në veri të territorit të Republikës së Kosovës, siç ka edhe me qytetarët tjerë, në pjesët dhe komunat tjera, përfshirë edhe ato komuna që përbëhen nga shumica etnike serbe. Por, dialog të jashtëm, për çështje të brendshme të Republikës së Kosovës, as nuk ka dhe as nuk do të ketë.
RADIO EVROPA E LIRË: A mund të ketë imponim të zgjidhjes për veriun, pasi të dyja palët nuk heqin dorë nga kërkesat e tyre?
ATIFETE JAHJAGA: Jo, nuk ka imponues dhe nuk ka kush ta bëjë imponimin, sepse secila zgjidhje duhet të jetë e vullnetshme dhe e zbatueshme. Gjithsesi, është e nevojshme dhe e Domosdoshme, gatishmëria e institucioneve të Republikës së Kosovës dhe vullneti i shprehur lirshëm i qytetarëve të një mjedisi të caktuar. Pra, këto të dyja janë procese të pandashme.
RADIO EVROPA E LIRË: Kosova dhe Serbia aspirojnë anëtarësimin në BE. Me gjasë të dyja tash për tash po e pengojnë njëra tjetrën në këtë rrugë, duke mos i normalizuar marrëdhëniet mes tyre. A është BE-ja vendi ku normalizohen marrëdhëniet?
ATIFETE JAHJAGA: Jo. Unë konsideroj se para se të hyjmë në Bashkimin Evropian, duhet të zgjidhen të gjitha çështjet dhe duhet të tregojmë gatishmërinë se jemi të gatshëm të përmbushim të gjitha standardet, normat dhe të gjitha kushtet, që të bëhemi vend anëtar i BE-së.
Edhe për Republikën e Kosovës, edhe për Republikën e Serbisë, do të jetë më e lehtë rruga drejt integrimit në Bashkimin Evropian, nëse ndihmojnë njëra – tjetrën dhe nëse japin shembull të mirë të ndërtimit të marrëdhënieve fqinjësore.
RADIO EVROPA E LIRË: Po i afrohemi ditës kur do të përfundojë faza e mbikëqyrjes së pavarësisë së Kosovës. Çfarë janë pritjet tuaja dhe posaçërisht sfidat pas përfundimit të kësaj faze?
ATIFETE JAHJAGA: Janë sfida normale të cilitdo shtet që është i lirë dhe i pavarur, dhe që është subjekt i barabartë me të gjitha shtetet tjera në arenën ndërkombëtare, që është faktor paqeje dhe stabiliteti dhe që është i gatshëm t’i marrë të gjitha obligimet dhe përgjegjësitë.
RADIO EVROPA E LIRË: Zonja presidente, po kalojmë në një çështje që ka të bëjë me mandatin tuaj. Thirrjet për dorëheqjen tuaj po bëhen më të zëshme nga partia më e madhe opozitare LDK. Cili është qëndrimi juaj, marrë parasysh se ka edhe një vendim të Gjykatës Kushtetuese për mandatin tuaj?
ATIFETE JAHJAGA: Vendimi i Gjykatës Kushtetuese ka të bëjë me një amandament konkret të Kushtetutës së Republikës së Kosovës, i cili është shpallur si kundër-kushtetues dhe është vlerësuar se me amandament nuk mund të shkurtohet mandate kushtetues i asnjë institucioni të zgjedhur.
Unë jam zgjedhur me vota në Kuvendin e Republikës së Kosovës dhe kandidimit tim i ka paraprirë një marrëveshje e realizuar në mes të tri partive politike. Jam e obliguar të respektoj Kushtetutën dhe ligjet e Republikës së Kosovës.
Unë, po ashtu kam shprehur edhe vullnetin që do ta respektoj edhe marrëveshjen politike. Por, u përket palëve të marrëveshjes që të arrijnë unitetin dhe t’i gjejnë modalitetet e respektimit apo zbatimit të kësaj marrëveshjeje.
Unë jam faktor uniteti dhe nuk më përket të mbaj njërën anë apo të përkrah qëndrimin e njërës apo dy partive politike. Asnjëherë nuk është paraparë dorëheqja e presidentit të vendit dhe mua nuk më lejohet të jap dorëheqje, sepse kjo do të nënkuptonte procedurë tjetër të zgjedhjeve dhe ushtrues detyre të presidentit të vendit.
Jemi një shtet me demokraci të konsoliduar dhe është paraparë që të kemi proces të rregullt të zgjedhjes së presidentit dhe procedurë të rregullt të dorëzimit të mandatit, pa marrë parasysh a bëhet kjo pas një muaji, apo pas një viti apo në fund të mandatit.
RADIO EVROPA E LIRË: Megjithatë, kërcënimet e LDK-së për bllokim të reformës zgjedhore e kushtetuese për shkak të mos-dorëheqjes suaj po bëhen më të shpeshta. Ju nuk do ta lironi postin e presidentes me qëllim të zbatimit të reformave?
ATIFETE JAHJAGA: Jo! Është çështje e partive politike se në ç’masë dhe si dëshirojnë të zbatojnë reformat kushtetuese dhe zgjedhore. Unë jam jashtë këtij procesi, por si presidente e vendit jam e interesuar që kjo reformë të jetë e suksesshme dhe të sjell shtetin ligjor.
Pas përfundimit të pavarësisë së mbikëqyrur për Republikën e Kosovës është jetike që nëpërmjet reformës kushtetuese dhe zgjedhore të arrijmë shkallën më të lartë të demokracisë cfare e kanë vendet e Bashkimit Evropian.
Këto ndryshime nuk lidhen me individë, me grupacione e as me parti politike, por lidhen me fatin e vendit dhe me drejtimin që do ta marrim në të ardhmen.
RADIO EVROPA E LIRË: Thatë se jeni faktor uniteti; sa të vështirë do ta keni ta zbatoni këtë rol, nëse LDK mban qëndrim kundër jush?
ATIFETE JAHJAGA: Unë kam qenë, jam dhe do të jem faktor uniteti, duke respektuar Kushtetutën dhe ligjet e vendit tonë. Unë kam marrëdhënie korrekte me të gjitha partitë dhe subjektet politike.
Në momente të caktuara, për vendime të caktuara, ndonjë parti politike mund të shpreh mospajtimin apo ndonjë qëndrim kundër ndaj meje si presidente e vendit, por unë këtë e shoh si pjesë të demokracisë dhe e tillë është. Në punën time nuk varem nga qëndrimet dhe veprimet e partive politike.