Lady Gaga bëhet nënë për herë të parë

Këngëtarja e njohur amerikane Lady Gaga është bërë nënë për herë të parë. Lady Gaga ka mirëpritur fëmijën e saj të parë së bashku me partnerin Michael Polansky.

Në disa fotografi të publikuara, këngëtarja 40-vjeçare shihet duke mbajtur foshnjën pranë gjoksit teksa shëtit.

Megjithatë, deri tani nuk janë bërë të ditura detaje të tjera, përfshirë emrin, gjininë apo datën e saktë të lindjes së fëmijës.

Lady Gaga, emri i vërtetë i së cilës është Stefani Germanotta, dhe Polansky janë bashkë që prej vitit 2020. Çifti u fejua në vitin 2024.

Gjatë viteve të fundit, ylli i muzikës pop kishte folur publikisht për dëshirën e saj për të krijuar një familje dhe për t’u bërë nënë.

Lajmi për ardhjen në jetë të fëmijës shënon një tjetër kapitull të rëndësishëm në jetën personale të artistes, e cila prej vitesh është një nga emrat më të njohur të muzikës dhe industrisë së argëtimit.

/rtsh.al/