Lirohen punëtorët e MPB të Serbisë

Pesë serbët e arrestuar në rajonin e Gjilanit më 25 shkurt të këtij viti, janë lëshuar sot në liri, ka njoftuar e ashtuquajtura ministri për Kosovën, njoftojnë medie të Beogradit

Ky burim nuk ka dhënë informacione të tjera por vetëm ka shtuar se të burgosurit tani janë në rrugë për në shtëpi, transmeton Koha.

Ata, katër punëtorë të MPB të Serbisë dhe në ofiqar, saktëson B92, janë arrestuar për shkak të shkeljes së rendit dhe të ligjit në Kosovë.

Të arrestuarit janë Zlatko Deniq dhe Goran Matropazoviq nga Pasjani, Nikola Trajkoviq nga Parteshi dhe Dragan Stojkoviq nga Budriga, të cilët kanë punuar për dhënien e pasaportave në të ashtuquajturën drejtori policore të Gjilanit me seli në Vranje. Me ta ishte edhe ofiqari Mladen Dimitrijeviq nga Pasjani.

Të arrestuarve më 25 shkurt u ishte caktuar paraburgimi 30 ditë. Pas skadimit të këtij afati, ata u dënuan edhe me një muaj burg. Sot, para afatit, ata u liruan, ndërsa hetimet kundër tyre po vazhdojnë.