METE: Ndryshon ligji dhe vendimet për sektorin minerar

Sektori minerar në vendin tonë do të ketë ndryshime thelbësore në mënyrën se si do të funksionojë në vazhdim. Gjatë prezantimit të paketës së re ligjore për këtë sektor, ditën e djeshme Ministri i Ekonomisë, Tregtisë dhe Energjetikës, Nasip Naço, u shpreh se ligji synon të përmirësojë praktikat e operimit, në mënyrë që të tërheqë drejt vetes investitorë strategjikë. Zonat minerare tashmë do të publikohen paraprakisht nga Ministria, ndërkohë që investitorët e interesuar do të mund të paraqesin interesin e tyre përmes ofertave. Një pikë tjetër që theksoi ministri në fjalën e tij ishte ajo e dhënies fund të copëzimit të investimeve, çka sjell më vonë probleme. “METE po ndërmerr një reformë të thellë në sektorin mineral, duke i dhënë fund praktikës ‘një kazmë një galeri’ dhe duke i dhënë dritë jeshile investimeve strategjike në këtë sektor. Më lejoni të saktësoj se kompanitë vendase dhe të huaja do të futen në garë mes tyre në marrjen e lejeve të kërkim-zbulimit dhe shfrytëzimit, në mënyrë që ta kthejmë këtë sektor në një industri të mirëfilltë për zhvillimin ekonomik”, tha Naço.