MJEDIS – Shkupi sërish ndërmjet 10 qyteteve më të ndotura në botë

SHKUP, 19 dhjetor /ATSH-AA/ – Kryeqyteti i Maqedonisë së Veriut mëngjesin e sotëm është mbuluar nga mjegulla e dendur, teksa Shkupi sërish gjendet në mesin e 10 qyteteve më të ndotura në botë.

Mjegulla në luginën e Shkupit ka reduktuar ndjeshëm dukshmërinë, duke vështirësuar trafikun.

Drejtoria për Punë Hidrometeorologjike paralajmëroi se në mëngjes do të ketë kushte për paraqitje të mjegullës nëpër lugina në të gjithë Maqedoninë e Veriut. Në Shkup, gjatë ditës është parashikuar mot me diell me vranësira të vogla dhe me erë të dobët jugore.

Ndërkohë, sipas të dhënave të publikuara në IQAir, Shkupi sërish radhitet në mesin e dhjetë qyteteve me ajrin më të ndotur në botë, respektivisht në vendin e dhjetë dhe bën pjesë në kategorinë e “pashëndetshme” me vlerë të Indeksit të Cilësisë së Ajrit (AQI) prej 156.

Nga vendet e rajonit, Sarajeva radhitet e treta me vlerë të AQI-së prej 225.

IQAir është një kompani teknologjike zvicerane që nxit individët, organizatat dhe qeveritë të përmirësojnë cilësinë e ajrit përmes informacionit dhe bashkëpunimit./   /os/