Macet e artistëve të mëdhenj, nga studioja në historinë e artit

TIRANË, 4 tetor /ATSH/ – Përpara se të bëheshin pjesë e historisë së artit, studiot e disa prej artistëve më të mëdhenj të shekullit XX duket se kishin edhe një prani të pazakontë: macet.

Një postim i publikuar nga Magazine Arte sjell në vëmendje marrëdhënien e artistëve me macet, duke përmendur Pablo Picasso, Henri Matisse, Salvador Dalí dhe Léonard Foujita.

Fotografitë tregojnë artistë me macet pranë tyre në studio, ndërsa postimi i përshkruan ato jo thjesht si kafshë shtëpiake, por si pjesë të atmosferës krijuese ku lindën disa prej veprave më të njohura të shekullit të kaluar.

Një prej fotografive i atribuohet Foujitës në vitin 1924, ndërsa postimi kujton edhe lidhjen e Dalí-t me një ocelot, të cilin artisti e merrte me vete edhe në ambiente publike.

“Macet nuk duartrokasin. Nuk pozojnë për historinë. Ulen mbi vizatim, të shikojnë dhe largohen kur drita nuk është më e duhura”, shkruhet në postim.

Në këtë këndvështrim, macet shfaqen si një lloj “kritiku” i heshtur i artistëve – indiferente ndaj famës, kryeveprave dhe historisë që po shkruhej përreth tyre.