Maroku dhe Zvicra, pengesat e fundit para derbit Spanjë-Portugali
Botërori i surprizave po i kthehet normalitetit. Japonia u dorëzua vetëm me penallti, për pjesën tjetër të mëdhenjtë po rifitojnë posedimin e Katarit 2022. Maroku dhe Zvicra janë pengesat e fundit mes Spanjës dhe Portugalisë dhe derbit të shumëpritur çerekfinal. Sigurisht që nuk është formalitet nëse mendon se çfarë kanë bërë afrikanët deri tani dhe forcën kolektive të përzgjedhjes së Yakin, i cili ndër të tjera eliminoi Italinë në kualifikueset e Botërorit.
Luis Enrique po shijon të vetmen kombëtare të vërtetë në Katar, e aftë për të luajtur si një ekip klubi. Do të jetë trashëgimia e një futbolli të mësuar me koncepte dhe lëvizje të caktuara, fakti mbetet që Spanja di të ecë sipas parimeve të konsoliduara dhe të memorizuara. Nuk ka më 9 false, Morata tani ka fituar pozicionin startues në qendër të sulmit.
Në krah Ferran Torres dhe Dani Olmo, me super mesfushën e krijuar tek Barça, të orkestruar nga Busquets “i vjetër” dhe i ushqyer nga freskia e Gavi dhe Pedri. Në anën tjetër një nga zbulimet e vërteta, Maroku i Redraguit, plot klas me anësorë mbrojtës të nivelit të Hakimi dhe Mazraoui, orkestrimi i Amrabat dhe tridenti Ziyech-El Nesyri-Boufal.
Fernando Santos, për momentin, të vetmin problem e ka me menaxhimin e Cristiano Ronaldos, duke qenë se nuk ka mundësi ta zëvendësojë, me zemërimin pothuajse jashtë kontrollit. Kush e di nëse marrëveshja miliona dollarëshe me arabët do ta qetësojë atë. Për pjesën tjetër është sekuenca e zakonshme e teknikës së aplikuar, me treshen e mesfushorëve sulmues (Bruno Fernandes-Bernardo Silva-Joao Felix) pas CR7.
Përballë është Zvicra kompakte, pyesni Mancinin për referenca. 4-2-3-1 i Yakin parashikon Xhakën dhe Freulerin përpara mbrojtjes me Shaqirin, Soë dhe Vargas pas Embolos. Ata dinë të mbyllin çdo hapësirë dhe të godasin në çdo moment. Të organizuar në të dyja fazat, zviceranët janë çdo gjë tjetër veçse një kundërshtar i lehtë.