“Mbetjet nuk ndahen, por groposen”/ Kryemadhi: 180 ditë xhirime në Sharrë, ku vidhet 15 euro për ton. SPAK të hetojë Veliajn
Partia e Lirisë ka xhiruar për 180 dite, inceneratorin e Tiranës për të treguar se çfarë ndodh me mbetjet në Sharrë.
Sipas Monika Kryemadhit, pamjet e marra përgjatë periudhës korrik 2022 deri ne janarin e këtij viti tregojnë se në Sharrë behet vetëm groposja e mbetjeve dhe për këtë proces bashkia e Tiranës paguan 29 euro për ton.
Për të mbështetur akuzat për korrupsion, Monika Kryemadhi ka sjellë shembullin e bashkisë Shkodër, e cila për groposjen e mbetjeve në landfillin e Bushatit paguan vetëm 16 mijë lekë, ndërsa qytetarët e Tiranës paguajnë 29 euro për ton.
MONIKA KRYEMADHI
DEPUTETE, PARTIA E LIRISE
“Nëse kanë pak moral sot drejtësia shqiptare duhet të bllokojë pagesat për inceneratorin e Tiranës, pasi aty vidhet 15 euro për ton , pasi të njëjtin proces e bën Bashkia e Shkodrës që depoziton në Bushat”
Kryemadhi ka akuzuar kreun e bashkisë së Tiranës si përgjegjës për inceneratorin e Tiranës.
“Firma e Erion Veliajt që ndoshta për SPAK-un nuk ekziston, është kjo firmë që i ndryshoi fatin inceneratorit të Tiranës ku për 30 vjet qytetarët e Tiranës do të paguajnë një proces korruptiv”
Kryemadhi i ka bërë thirrje Spak-ut të zbardhë çështjen e inceneratorit të Tiranës.
“Çështja e inceneratorit të Tiranës është një nga dosjet më të nxehta dhe nëse SPAK-u nuk reagon mua nuk më ngel gjë veçse të protestoj para SPAK-ut. Sepse këtu nuk mund t’i mbyllë sytë as SPAK-u dhe as ndonjë ndërkombëtar që kërkon të mbroje Erion Veliajn dhe Edi Ramën”
Deri tani, prokuroria e posaçme kundër krimit të organizuar dhe korrupsionit ka mbyllur hetimet për inceneratorin e Elbasanit dhe Fierit, por ende nuk ka dalë me konkluzione për inceneratorin e Tiranës.