Mbi katër dekada në shërbim të qytetarëve, Policia e Shtetit nderon me “Certifikatën e Karrierës” 7 punonjës policie, të cilët mbyllën rrugëtimin e tyre profesional

Në një ceremoni solemne të zhvilluar në mjediset e Drejtorisë së Përgjithshme të Policisë së Shtetit, Drejtori i Përgjithshëm, Drejtues Madhor Skender Hita, ka vlerësuar me “Certifikatën e Karrierës” shtatë punonjës policie, të cilët mbyllën rrugëtimin e tyre profesional pas më shumë se 40 vitesh shërbimi aktiv.

Ceremonia mblodhi drejtues të lartë të Policisë, përfaqësues të Akademisë së Sigurisë dhe kolegë, për të nderuar kontributin e atyre që konsiderohen si “memoria dhe kolona e institucionit”.

Skender Hita: Përvoja juaj, referencë për brezat e rinj

Gjatë fjalës së tij, Drejtues Madhor Skender Hita vuri theksin te sakrifica dhe dinjiteti me të cilin këta punonjës kanë shërbyer ndër dekada, duke kontribuar në forcimin e sigurisë publike dhe rritjen e besueshmërisë së Policisë.

“Jemi mbledhur jo thjesht për të përcjellë disa punonjës në pension, por për të vlerësuar dhe nderuar kolegë që kanë dhënë dekada nga jeta e tyre për sigurinë publike. Përvoja, profesionalizmi dhe vlerat që keni ndërtuar do të mbeten një referencë e vyer për brezat e rinj. Dera e Policisë së Shtetit do të jetë gjithmonë e hapur për këshillat tuaja,” u shpreh z. Hita.

Drejtori i Përgjithshëm falënderoi gjithashtu familjet e efektivëve, duke i cilësuar ato si mbështetjen kryesore që kanë ndarë vështirësitë dhe sakrificat e një detyre sa fisnike, aq edhe sfiduese.

Mirënjohja e veteranëve të Policisë

Punonjësit që mbyllën karrierën shprehën mirënjohjen e tyre për vlerësimin e marrë, duke vlerësuar bashkëpunimin me eprorët dhe kolegët ndër vite. Ata i uruan Drejtorit të Përgjithshëm suksese në misionin e rëndësishëm të drejtimit të Policisë së Shtetit në shërbim të qytetarëve shqiptarë.

Punonjësit e vlerësuar me “Certifikatën e Karrierës”:

Drejtues i Parë: Albert Dervishaj

Drejtues i Parë: Skender Kalemi

Drejtues: Dritan Avdyli

Drejtues: Remzi Brahimi

Kryekomisar: Nikolin Thana

Kryekomisar: Idajet Shatro

Kryekomisar: Arben Ibro

/rtsh.al/