Mercedes gjobitet me 10 mijë euro

Në përfundim të Çmimit të Madh të Spanjës në Formula 1, për sezonin 2023, Mercedesi mori një gjobë prej 10,000 eurosh për shkeljen e rregullave brenda qarkut të mbyllur të garës. Kjo gjë është bërë e ditur nga Drejtoria e Garës spanjolle përmes një shënimi të drejtuar skuadrës gjermane. Shkelja e kryer nga ekipi gjerman është në kundërshtim me nenin 12.2.1 të Kodit Ndërkombëtar të Sporteve, për shkak të mosrespektimit të procedurave pas garës përsa i përket rregullave brenda qarkut të mbyllur të garës.

Mercedesi ka paguar për praninë e paautorizuar të fizioterapistëve brenda cirkuitit, por ka shpëtuar gjithsesi vetëm me një gjobë financiare dhe pa ndëshkime të mëtejshme që mund të ndikonin me penalizime për pilotët në rendin e mbërritjes. Por duke lënë mënjanë gjobën, Mercedesi përjetoi një rilindje të vërtetë në Çmimin e Madh të Spanjës falë përditësimeve më të fundit të bëra në njëvendëshet e tyre. Lewis Hamilton, rikthehet në podium duke përfunduar në vendin e dytë pas një Max Verstappen të pakapshëm.

Një rezultat mjaft të mirë arriti edhe piloti tjetër i Mercedesit, George Russell, i cili u rendit në vendin e tretë. Pas këtyre rezultateve, drejtuesit e Mercedesit janë të kënaqur me ndryshimet në makinat e garës, dhe shpresojnë të arrijnë një rezultat të kënaqshëm edhe në garën e ardhshme.