Messi nderohet në Spanjë, një tjetër moment i madh për legjendën

Lionel Messi vazhdon të shkruajë histori!

Legjenda argjentinase është shpallur fitues i çmimit prestigjioz “Princesha e Asturias” për Sportin 2026, një nga vlerësimet e rëndësishme ndërkombëtare që nderojnë arritjet dhe kontributin në sport.

Vendimi u shpall më 3 qershor nga juria e Fondacionit Princesha e Asturias, e cila vlerësoi karrierën e jashtëzakonshme të yllit argjentinas, sukseset e tij në futboll dhe angazhimin humanitar për të ndihmuar fëmijët në nevojë.

Nga triumfi historik me Argjentinën në Kupën e Botës 2022, te tetë Topat e Artë dhe vitet e lavdishme te Barcelona, Messi ka lënë gjurmë të pashlyeshme në historinë e futbollit.

Por ky çmim nuk lidhet vetëm me atë që ka arritur në fushën e lojës. Juria vlerësoi edhe punën e tij përmes fondacionit personal, i cili mbështet aksesin e fëmijëve në arsim dhe kujdes shëndetësor.

Ceremonia zyrtare e ndarjes së çmimeve do të mbahet më 23 tetor 2026, në Oviedo të Spanjës, ku do të marrin pjesë edhe anëtarë të familjes mbretërore spanjolle.