“Mësuesia në rrezik”, Boçi i drejtohet qeverisë: Mbajtja në provë 3-mujore e mësuesve është antiligjore
Deputeti demokrat Luçiano Boçi ka ngritur alarmin për mësuesinë që sipas tij është në rrezik. Sipas tij, vendimi për të mbajtur në provë 3-mujore mësuesit është antiligjore dhe bien ndesh me kontratën midis Ministrisë së Arsimit dhe sindikatave.
Më tej Boçi ka ngritur dhe disa pyetje se cili do vlerësojë performancën 3-mujore të mësueve në provë? Boçi thekson se duhet t’i jepet fund kalvarit torturues të mësuesve pasi sipas tij po i shkaktohet një dëm i pallogaritshëm edukimit, shoqërisë dhe mbi të gjitha vendit.
“MËSUESIA NË RREZIK. Vendimi për të mbajtur në provë tre mujore mësuesit “fituesë” të portalit, është antiligjor dhe bie ndesh me kontratën midis Ministrisë dhe sindikatave. Jo vetëm kaq! Cili apo cilët janë ata që do përcaktojnë performancën tre mujore të mësuesit, sepse puna e tij matet me arritje në fund të një viti?! Do jetë komisari politik, alias drejtori juaj i emëruar nga partia? Apo shefi i zyrës X i DA edhe ky i emëruar nga partia?! Apo patronazhisti, pasi të përcaktojë bindjen politike, apo anëtarësimin politik?! Mjaft vuajtje i keni shkaktuar mësuesit! Kjo është shumë shumë e tepërt. ️Mësuesi për t’u bërë i tillë, i nënshtrohen një kalvari torturues me vite akademike, licenca, kualifikime, provime e lloj-lloj marifetesh. E gjithë kjo panoramë vuajtjesh, të krijon idenë sikur rroga e një mësuesi është 10.000 euro, ndërkohë që me zor arrin në 60.000 lekë. Një njeriu i duhet kaq shumë stërmundim e investim, sa sot të bëhesh mësues ngjan mision i pavlerë, por dhe i pamundur. Boll i morët zvarrë mësuesit dhe e keni bërë mësuesinë gogol e i keni zbrazur auditoret e fakulteteve të mësuesisë, duke i shkaktuar dëm të pallogaritshëm edukimit, shoqërisë e vendit. Mësuesi nuk është kavie eksperimentale e as i sëmuri juaj klinik që ju sa herë ju teket, i shtoni terapitë e tuaja shfazuese e të përdala politike. Nëse doni që mësuesit të rrisin performancën atëhere: I rrisni pagën! I ktheni dinjitetin! I jepni mbështetje! I lehtësoni punën! Investoni në arsim! I jepni autoritet! I çlironi nga drejtuesit politikë! I jepni status! Vendimet e deritanishme tuajat bien erë politikë të qelbur dhe janë shantazh në prag të situatave zgjedhore! Mësuesit duhet të reagojnë”, shkruan Boçi në rrjetin social Facebook.
/rtsh.al/