Ministri i Mbrojtjes së Estonisë: NATO gati të përdorë forcën ndaj provokimeve ruse
Ministri i Mbrojtjes së Estonisë Hanno Pevkur ka deklaruar se NATO është e gatshme të përdorë forcën nëse është e nevojshme ndaj provokimeve ruse.
Kjo deklaratë vjen në vazhdim të eskalimeve të fundit të provokimeve ruse në hapësirën ajrore të vendeve anëtare të NATO-s, duke ngritur alarmin për një rrezik të ri në kufirin lindor të Evropës.
“Pamë të premten se NATO funksionon në mënyrë efikase… madje deri në pikën që, nëse do të ishim vërtet të detyruar të përdornim mjetin e fundit, i cili është përdorimi i forcës, atëherë ka gatishmëri edhe për atë”, tha Pevkur, duke iu referuar shkeljes së hapësirës ajrore estoneze nga avionë rusë më 19 shtator.
Më 19 shtator, tre avionë luftarakë rusë MiG-31 hynë pa leje në hapësirën ajrore estoneze mbi Gjirin e Finlandës duke qëndruar atje për 12 minuta para se të largohen.
Talini deklaroi se avionët kaluan pa plan fluturimi, me transponderët e fikur dhe pa komunikim radio me kontrollin ajror estonez.
Moska e mohoi çdo shkelje, duke e cilësuar fluturimin si “të planifikuar” në përputhje me rregullat ndërkombëtare.
Pevkur vlerësoi se provokimet ruse synojnë të zhvendosin fokusin perëndimor nga Ukraina. “Kjo është pikërisht ajo që dëshiron Rusia – të na shpërqendrojë nga ndihma për Ukrainën dhe të na detyrojë të fokusohemi te oborri ynë,” tha ai. “Ky është qëllimi kryesor pas këtyre lloj provokimeve.”
Pas këtyre incidenteve, NATO lançoi misionin e saj mbrojtës “Eastern Sentry” më 12 shtator.
Sekretari i Përgjithshëm i NATO-s, Mark Rutte, e përshkroi si një operacion fleksibël për të forcuar mbrojtjen në krahun lindor, nga shtetet baltike deri në Rumaninë dhe Bullgarinë.
“Duhet të bëjmë të qartë vendosmërinë dhe aftësinë tonë për të mbrojtur territorin tonë”, tha Rutte në një konferencë shtypi në Bruksel.
Misioni përfshin avionë të gatshëm 24-orëshe dhe sisteme të avancuara kundër dronëve, duke zëvendësuar përgjegjësitë individuale të vendeve anëtare me një politikë kolektive.
/rtsh.al/