Monti në vizitë të papritur në Afganistan

Italia i ka rreth 3.500 trupa në Afganistan dhe planifikon t’i tërheqë ato, së bashku me pjesën tjetër të ushtarëve të koalicionit që udhëheq NATO-ja, në fund të vitit 2014.

Duke folur në konferencën e përbashkët për media me Karzain, Monti ka thënë se është e rëndësishme që marrëdhëniet ndërmjet Afganistanit dhe komunitetit ndërkombëtar të vazhdojnë edhe pas vitit 2014.

“Është e rëndësishme që marrëdhëniet ndërmjet Afganistanit dhe bashkësisë ndërkombëtare të modifikohen me kushte të reja, por të mos ndalojnë”, ka thënë Monti.

Sipas tij, raportet e reja duhet të bazohen më shumë në bashkëpunimin ekonomik, sesa në ndihmën ushtarake.

Monti paraprakisht ka vizituar kontingjentin italian në provincën e Heratit.

Sipas agjencisë së lajmeve AFP, 52 ushtarë italianë kanë humbur jetën në luftën 11-vjeçare kundër kryengritësve talebanë në Afganistan.