Moti i keq- Pezullohen lundrimet Durrës-Bari dhe anasjelltas. S’lejohet lundrimi as në Portin e Shëngjinit

Lundrimet e linjës Durrës-Bari dhe anasjelltas janë pezulluar këtë të diel, si pasojë e motit të keq me erë të fortë e cila ka përfshirë të dy anët e Adriatikut.

Të gjithë pasagjerët, të cilët kanë rezervuar lundrimin e tyre, nisjet do të kryhen ditën e nesërme, në orën 22:00, me normalizimin e situatës së motit.

Ndërkohë, trageti “AF MIA” do të niset sipas parashikimit.

Edhe në Portin e Shëngjinit moti i keq ka sjellë pezullim të përkohshëm të lundrimit detar. Autoritetet portuale njoftojnë se që prej orës 6:00 të mëngjesit të 23 marsit, erërat e forta dhe dallgët e larta e bëjnë të rrezikshme lundrimin për anijet dhe mjetet e vogla detare.

Në këtë situatë, kapiteneria e portit ka urdhëruar ndalimin e përkohshëm të hyrje-daljeve të anijeve, deri në përmirësimin e kushteve atmosferike. Autoritetet u bëjnë thirrje të gjithë lundërtarëve dhe peshkatarëve të shmangin daljen në det deri në një njoftim të dytë, duke ruajtur sigurinë e tyre dhe të mjeteve lundruese.

/rtsh.al/