Myftinia e Shkodrës, 100 pako për të bllokuarit

Myftinia Shkodër ka dërguar në Pukë një kamion me 100 pako ushqimore për banorët e izoluar nga bora ne këtë qytet. Lidhur me këtë anëtari i Kryesisë së Komunitetit Mysliman të Shqipërisë, z. Genti Kruja ka deklaruar se që nga ditët e para të kësaj situate, Komuniteti Mysliman i Shqipërisë është sensibilizuar me njerëzit në nevojë dhe ka bërë thirrje që të mblidhen ndihma të ndryshme për të izoluarit nga dëbora. Në këtë kontekst, ai ka falënderuar edhe angazhimin e Myftinisë Shkodër dhe dërgesën e kësaj dite drejt Pukës, ku do të ndihmohen 100 familje në nevojë dhe të izoluara nga dëbora. Ndërkohë, Myftiu i Shkodrës Imam Muhamed Sytari ka theksuar se këto ndihma janë një kontribut human në një situatë, ku të gjithë duhet të bashkëpunojnë për tejkalimin e saj. Myftiu ka thënë, se komunitetet fetare kanë qenë të parat që janë sensibilizuar me sinqeritet për të ndihmuar njerëzit në nevojë, jo me preferenca raciste por pa dallime përçarëse.
A.Dushi