NATO paralajmëron rritje të fluturimeve të paautorizuara, ndërsa F-16 rumun neutralizon një dron detar pranë Neptum Deep

Një dron detar i ngarkuar me eksploziv u shkatërrua sot nga Forcat Ajrore Rumune, vetëm pak qindra metra larg impiantit të gazit Neptum Deep në Detin e Zi.

Incidenti ndodhi në orën 06:28, kur një anije tregtare raportoi praninë e dronit rreth 80 milje detare në lindje të qytetit të Konstancës.

Sipas Ministrisë së Mbrojtjes së Rumanisë, dy avionë luftarakë F-16 u dërguan menjëherë në zonë dhe njëri prej tyre e neutralizoi dronin.

Ministri i Mbrojtjes, Radu Miruta, deklaroi se pajisja nuk vinte nga Ukraina dhe ishte e pajisur me eksploziv, duke e cilësuar incidentin si një kërcënim serioz për sigurinë kombëtare.

Ky është episodi më i fundit i fluturimeve të paautorizuara me dronë në Evropën Lindore, të cilat janë shtuar ndjeshëm muajt e fundit. NATO ka raportuar rrëzimin e katër dronëve në territorin rumun, ndërsa rrëzimi i fundit ndodhi vetëm fundjavën e kaluar.

Presidenti rumun Nicăușor Dan e dënoi ashpër incidentin, duke e cilësuar si një “përshkallëzim të papërgjegjshëm” dhe duke ia atribuar Rusisë.

Ai e përshkroi ndërhyrjen e sotme si një “garë me kohën” për të mbrojtur jetën e qindra punonjësve që ndodhen në platformën Neptum Deep, e cila pritet të nisë funksionimin në vitin 2027.

Në një tjetër njoftim, autoritetet rumune raportuan rrëzimin e një droni pas sulmeve ruse në Ukrainë, i cili ra në një zonë të pabanuar pranë fshatit Grindu, pa shkaktuar viktima.

Ndërkohë, presidenti ukrainas Volodymyr Zelenskyy u bëri thirrje vendeve partnere për një përgjigje ndërkombëtare ndaj “përshkallëzimit” të Moskës, pas bombardimeve të fundit që lanë të paktën 16 viktima në dhe rreth Kievit.