Ndahet nga jeta parodisti i njohur Mane Lumani – Vlora humbet një ikonë të humorit

TIRANË, 1 mars/ATSH/ – Bota e artit shqiptar ka humbur sot një nga figurat e saj më të dashura. Mane Lumani, aktor, humorist dhe një nga emrat e katër parodistëve të Vlorës, është ndarë nga jeta në moshën 79-vjeçare, pas një sëmundjeje të rëndë me të cilën ishte përballur prej kohësh.

Mane Lumani mbetet një ndër zërat më autentikë të humorit vlonjat, i njohur për interpretimet origjinale e ironike si dhe për batutat që e bënë pjesë të pandarë të traditës së parodive të qytetit bregdetar. Për dekada me radhë, ai ka kontribuar në skenën artistike me një stil të veçantë komik, duke sjellë gëzim dhe duke krijuar kujtime që ende i qëndrojnë kohës.

I rritur dhe formuar artistikisht në një qytet ku humori është kulturë, Lumani u bë një referencë për brezat që erdhën më pas. Bashkë me trupën e parodistëve të Vlorës, ai u shndërrua në simbol të satirës qytetare, duke i dhënë artit shqiptar një dimension të veçantë, të bazuar në karaktere të jetës së përditshme dhe në shpirtin e lirë vlonjat.
Ndarja nga jeta e Mane Lumanit përbën një humbje të madhe për familjen, komunitetin artistik dhe për të gjithë ata që u rritën mes humorit të parodive vlonjate. Kujtimi i tij do të mbetet i gjallë përmes dhjetëra roleve, interpretimeve dhe trashëgimisë artistike që ai la pas.