Ngjarje e rëndë midis Rjollit dhe Ranës së Hedhun, i riu bie nga mjeti lundrues dhe ndërron jetë në spital

Një aksident i rëndë detar me pasojë humbjen e jetës së një të riu ka ndodhur pasditen e sotme në zonën midis Rjollit dhe Rënës së Hedhur, në qarkun e Shkodrës.

Ngjarja është regjistruar rreth orës 16:15 në thellësi të ujërave detare.
Dinamika e aksidentit në det

Sipas të dhënave paraprake, në bordin e një mjeti lundrues të tipit gomone ndodheshin tre persona. Dyshohet se aksidentalisht, njëri prej tyre ka rënë në det dhe është goditur rëndë nga helika e motorit të gomones.

Në vendngjarje kanë ndërhyrë menjëherë shërbimet e Policisë Kufitare dhe Njësisë Policore Detare për t’i ardhur në ndihmë të dëmtuarit.
“Shtetasi K. Gj., rreth 24 vjeç, është transportuar menjëherë nga shërbimet e Policisë Kufitare dhe më pas me autoambulancë në spital për ndihmë mjekësore, por, si pasojë e plagëve të marra, ka humbur jetën,” njoftuan zyrtarisht burimet policore.

Veprimet hetimore në vijim

Marrja e ndihmës së shpejtë mjekësore nuk ka mundur t’i shpëtojë jetën 24-vjeçarit për shkak të dëmtimeve të rënda fizike të pësuara nga pjesët xhiruese të motorit.

“Grupi hetimor po vijon veprimet për sqarimin e plotë të rrethanave të rastit,” konfirmoi Policia e Lezhës.

Ekspertët po marrin në pyetje dy personat e tjerë që ndodheshin në bordin e gomones për të rindërtuar me precizion të gjithë mekanizmin e ngjarjes tragjike.

/rtsh.al/